సోనియా గాంధీ ఆత్మకథ ‘బిలాంగింగ్: ఏ జర్నీ ఆఫ్ లవ్’ నవంబర్ 10న విడుదల కానున్న నేపథ్యంలో ఆమె పిల్లలు, కాంగ్రెస్ ఎంపీలు రాహుల్ గాంధీ, ప్రియాంక గాంధీ వాద్రా భావోద్వేగ పోస్టులు చేశారు. తన తండ్రి రాజీవ్ గాంధీ జయంతి సందర్భంగా రాహుల్ తన తల్లి జీవితంలోని కష్టాలను గుర్తు చేసుకున్నారు.
1991లో రాజీవ్ గాంధీ హత్య అనంతరం సోనియా గాంధీ ఎన్నో సవాళ్లను ఎదుర్కొన్నారని రాహుల్ పేర్కొన్నారు. వాటన్నింటినీ ఆమె ఎంతో హుందాగా, ధైర్యంగా అధిగమించారని ప్రశంసించారు. 35 ఏళ్ల క్రితం తన తల్లిదండ్రులిద్దరినీ చివరిసారిగా చూశానని భావోద్వేగానికి గురైన ఆయన.. తన తల్లి ఎదుర్కొన్న కష్టాలు, వ్యక్తిగత పోరాటాల గురించి తనకు, తన సోదరి ప్రియాంకకు మాత్రమే తెలుసని అన్నారు.
వ్యక్తిగత విషయాలను బహిరంగంగా పెద్దగా పంచుకోని సోనియా గాంధీ తన జీవితంలోని అనుభవాలను పుస్తక రూపంలో వెల్లడించేందుకు ముందుకు రావడం తనకు ఎంతో గర్వంగా ఉందని రాహుల్ అన్నారు. ప్రస్తుతం తన తల్లిని చూస్తూ తన తండ్రి కూడా గర్వపడుతుంటారని పేర్కొన్నారు.
ప్రియాంక గాంధీ కూడా తన తల్లిపై ప్రశంసలు కురిపించారు. తన తల్లిదండ్రులది అద్భుతమైన ప్రేమబంధమని పేర్కొన్న ఆమె తన హృదయంలోని భావోద్వేగాలకు నిజాయతీగా అక్షరరూపం ఇచ్చిన సోనియాను చూసి గర్వంగా ఉందన్నారు. ఎంతో సహృదయంతో వ్యవహరించే తన తల్లి.. అవసరమైన సందర్భాల్లో ధీరవనితగా మారుతారని ప్రశంసించారు.
ఇప్పటివరకు సోనియా గాంధీని కేవలం రాజకీయ నేతగా చూసిన వారికి ఈ పుస్తకం ద్వారా ఆమె వ్యక్తిగత జీవితాన్ని, భావోద్వేగాలను తెలుసుకునే అవకాశం లభిస్తుందని ప్రియాంక అన్నారు. దేశం, కుటుంబం పట్ల సోనియా గాంధీకి ఉన్న ప్రేమకు ఆమె జీవితం నిదర్శనంగా నిలుస్తుందని పేర్కొన్నారు. ‘బిలాంగింగ్ ఏ జర్నీ ఆఫ్ లవ్’ నవంబర్ 10న పాఠకుల ముందుకు రానుంది.