ఆసియా క్రీడల్లో తొలిసారి ప్రవేశపెట్టిన మిక్స్డ్ మార్షల్ ఆర్ట్స్ (MMA)లో భారత్కు చారిత్రక పతకం లభించింది. మహిళల ట్రెడిషనల్ 60 కేజీల విభాగంలో సుచికా తారియల్ కాంస్య పతకం సాధించారు. దీంతో ఆసియా క్రీడల్లో MMAలో భారత్ తరఫున పతకం గెలిచిన తొలి అథ్లెట్గా ఆమె చరిత్ర సృష్టించారు. 36 ఏళ్ల సుచికా ప్రయాణం వెనుక ఎన్నో సవాళ్లు ఉన్నాయి.
12 ఏళ్లకే జూడో వైపు అడుగు
సుచికా తారియల్కు 12 ఏళ్ల వయసులో ఎదురైన ఓ వేధింపుల ఘటన ఆమె జీవితాన్ని మలుపు తిప్పింది. తనను తాను రక్షించుకోవడానికి మార్షల్ ఆర్ట్స్ నేర్చుకోవాలని నిర్ణయించుకున్నారు. అలా జూడోలో శిక్షణ ప్రారంభించారు. ఆ తర్వాత అదే ఆమె కెరీర్గా మారింది. ఢిల్లీలోని జవహర్లాల్ నెహ్రూ స్టేడియంలో శిక్షణ మొదలుపెట్టి.. అనంతరం పాలంలోని దాదా దేవ్ మందిర్ సెంటర్, భోపాల్లోని సాయ్ కేంద్రంలోనూ శిక్షణ తీసుకున్నారు.
ఎనిమిదిసార్లు జాతీయ ఛాంపియన్
జూడోలో సుచికా తనదైన ముద్ర వేశారు. ఎనిమిదిసార్లు జాతీయ ఛాంపియన్గా నిలిచారు. 20కిపైగా అంతర్జాతీయ పోటీల్లో భారత్కు ప్రాతినిధ్యం వహించారు. 2019 కామన్వెల్త్ జూడో ఛాంపియన్షిప్, సౌత్ ఏషియన్ గేమ్స్లో స్వర్ణాలు సాధించారు. 2022 బర్మింగ్హామ్ కామన్వెల్త్ గేమ్స్లోనూ భారత్ తరఫున జూడోలో పోటీ పడ్డారు. అనంతరం కురాష్, జియుజిట్సు, MMA వైపు అడుగులు వేశారు.
కుటుంబం ఆందోళన.. అయినా వెనక్కి తగ్గలేదు
క్రీడలను కెరీర్గా ఎంచుకోవాలన్న సుచికా నిర్ణయంపై ఆమె కుటుంబం తొలుత ఆందోళన వ్యక్తం చేసింది. తరచూ ప్రయాణాలు చేయాల్సి రావడం, క్రీడా జీవితం ఎదుర్కొనే సవాళ్లు వారికి భయాన్ని కలిగించాయి. అయినప్పటికీ సుచికా తన లక్ష్యం నుంచి వెనక్కి తగ్గలేదు. ఎన్నో కష్టాలను దాటుకుంటూ అంతర్జాతీయ స్థాయిలో గుర్తింపు తెచ్చుకున్నారు. ప్రస్తుతం ఆమె సీఐఎస్ఎఫ్లో హెడ్ కానిస్టేబుల్గా కూడా సేవలందిస్తున్నారు.
మూడో ప్రయత్నంలో చారిత్రక పతకం
మల్టీ-స్పోర్ట్స్ ఈవెంట్లలో సుచికాకు ఇది మూడో ప్రయత్నం. 2022 కామన్వెల్త్ గేమ్స్లో జూడో, 2023 ఆసియా క్రీడల్లో కురాష్లో భారత్కు ప్రాతినిధ్యం వహించిన ఆమె.. ఇప్పుడు MMAలో పోడియంపై నిలిచారు. మంగోలియాకు చెందిన అల్టాన్చిమెగ్ బైగాల్మాను 2-0తో ఓడించి సెమీఫైనల్కు చేరుకోవడంతోనే పతకం ఖాయమైంది. అనంతరం సింగపూర్కు చెందిన టియో హుయ్ హూన్తో సెమీఫైనల్లో ఓడినా.. కాంస్య పతకంతో చరిత్ర సృష్టించారు.
ఆత్మరక్షణ కోసం 12 ఏళ్ల వయసులో జూడో నేర్చుకున్న బాలిక.. 24 ఏళ్ల తర్వాత అదే పోరాట స్ఫూర్తితో ఆసియా క్రీడల వేదికపై భారత MMA చరిత్రలో తొలి పతకాన్ని అందుకోవడం విశేషం.