నీట్ ప్రశ్నపత్రం లీకేజీ వ్యవహారం, జాతీయ పరీక్షల సంస్థ (NTA)లో సంస్కరణలకు సంబంధించిన పిటిషన్లపై సుప్రీంకోర్టు మరోసారి విచారణ చేపట్టింది. పరీక్షల నిర్వహణలో తాత్కాలిక చర్యలతో సరిపెట్టకుండా శాశ్వత, సమగ్ర వ్యవస్థను ఏర్పాటు చేయాల్సిన అవసరం ఉందని ధర్మాసనం స్పష్టం చేసింది.
జస్టిస్ పి.ఎస్. నరసింహ, జస్టిస్ అలోక్ ఆరాధే ధర్మాసనం NTAలో చేపట్టిన సంస్థాగత మార్పులు, ప్రశ్నపత్రాల భద్రత, పరీక్షల పారదర్శకత, సైబర్ సెక్యూరిటీ తదితర అంశాలపై సమగ్ర వివరాలతో అఫిడవిట్ సమర్పించాలని కేంద్రాన్ని కోరింది. సంస్కరణలను కేవలం సందర్భానుసారంగా కాకుండా సంస్థాగతంగా అమలు చేయాలని పేర్కొంది.
పరీక్షల నిర్వహణలో పదేపదే తలెత్తుతున్న సమస్యలకు శాశ్వత పరిష్కారం చూపాల్సిన అవసరం ఉందని కోర్టు అభిప్రాయపడింది. NTAలో ప్రతిపాదించిన సంస్థాగత మార్పులు, వివిధ విభాగాల ఏర్పాటు, భద్రతా చర్యలు ఎంతవరకు అమలయ్యాయో వివరించాలని ఆదేశించింది. భవిష్యత్తులో ప్రశ్నపత్రాల లీకేజీ వంటి ఘటనలు పునరావృతం కాకుండా పటిష్ఠమైన వ్యవస్థను రూపొందించడంపై దృష్టి పెట్టాలని సూచించింది.
ప్రశ్నపత్రాల ప్రింటింగ్ నుంచి పరీక్ష కేంద్రాలకు చేరే వరకు భద్రత, డేటా రక్షణ, ఎన్క్రిప్షన్, పరీక్షా కేంద్రాల పర్యవేక్షణ, అభ్యర్థుల గుర్తింపు వంటి అంశాలపైనా సుప్రీంకోర్టు వివరాలు కోరింది. NEETను భవిష్యత్తులో కంప్యూటర్ ఆధారిత పరీక్షగా మార్చే అంశంపై కూడా కేంద్రం తన వైఖరిని స్పష్టం చేయాలని కోర్టు సూచించింది.
విద్యార్థుల భవిష్యత్తు, పరీక్షా వ్యవస్థపై ప్రజల నమ్మకాన్ని కాపాడేందుకు NTAను సంస్థాగతంగా బలోపేతం చేయాల్సిన అవసరం ఉందని ధర్మాసనం స్పష్టం చేసింది. NTAలో చేపడుతున్న సంస్కరణల అమలును తాము పర్యవేక్షిస్తామని పేర్కొంటూ, ఇకపై తాత్కాలిక చర్యలకు బదులుగా పూర్తి స్థాయి శాశ్వత వ్యవస్థను ఏర్పాటు చేయాలని కేంద్రాన్ని ఆదేశించింది.