D Spiritual: Apr 21: తెలంగాణ ప్రభుత్వం కాళేశ్వరం ఆలయ అభివృద్ధిపై ప్రత్యేక దృష్టి పెట్టింది. ఇందుకోసం సుమారు 200 కోట్ల రూపాయలు ఖర్చు చేయడానికి సిద్ధమైంది. భక్తులకు మెరుగైన వసతులు కల్పించడం, ఆలయ ప్రాంగణాన్ని విస్తరించడం వంటి అంశాలపై సీఎం అధికారులకు స్పష్టమైన దిశానిర్దేశం చేశారు.
ఈ సందర్భంగా సీఎం రేవంత్ రెడ్డి శ్రీకాళేశ్వర ముక్తేశ్వర స్వామి దేవస్థానం ను సందర్శించి స్వామివారిని దర్శించుకున్నారు. కాళేశ్వరం చేరుకున్న సీఎంకు ఆలయ అధికారులు, అర్చకులు పూర్ణకుంభంతో స్వాగతం పలికారు. అనంతరం స్వామివారికి ప్రత్యేక పూజలు నిర్వహించారు. అలాగే శ్రీ శుభానంద అమ్మవారి ఆలయంలో కూడా ప్రత్యేక పూజలు చేశారు.
తర్వాత ఆలయ అభివృద్ధికి సంబంధించిన పలు పనులకు సీఎం శంకుస్థాపన చేశారు. రూ.198 కోట్ల వ్యయంతో చేపట్టనున్న అభివృద్ధి నిర్మాణాలను ప్రారంభించారు. ప్రస్తుతం సిమెంట్తో నిర్మించిన ప్రధాన గర్భాలయం మరియు అమ్మవారి ఆలయాలను తొలగించి రాతితో కొత్త నిర్మాణాలు చేపట్టాలని నిర్ణయించారు.
గోదావరి నది ఒడ్డున ఉన్న ఈ చారిత్రాత్మక ఆలయంలో దర్శనాన్ని సులభతరం చేయడానికి కొత్త పరిపాలనా భవనం, విశాలమైన క్యూ కాంప్లెక్స్ మరియు యాత్రికుల కోసం మెరుగైన మౌలిక సదుపాయాలు ఏర్పాటు చేయనున్నారు.
అదేవిధంగా రూ.3.70 కోట్ల అంచనా వ్యయంతో కాళేశ్వరం బస్టాండ్ నిర్మాణ పనులకు కూడా సీఎం శంకుస్థాపన చేశారు. భక్తులకు అవసరమైన కనీస సదుపాయాలు అందేలా మరియు ఆలయ పరిసరాలు విస్తరించేలా అధికారులకు సూచనలు ఇచ్చారు.