ఆర్టిఫిషియల్ ఇంటెలిజెన్స్ (ఏఐ) రంగంలో తన ప్రయోగాలను మరింత విస్తరిస్తోంది సోషల్ మీడియా దిగ్గజం మెటా. ఇప్పటివరకు స్మార్ట్‌ఫోన్లు, కంప్యూటర్లలో చాట్‌బాట్ల రూపంలో కనిపించిన ఏఐని భౌతిక ప్రపంచంలోకి తీసుకురావాలనే లక్ష్యంతో ముందడుగు వేస్తోంది. ఈ క్రమంలో చైనాకు చెందిన రోబోటిక్స్ స్టార్టప్ ‘ఫోరియర్‌’తో కలిసి ‘మ్యాక్స్‌’ (Max) పేరుతో ఓ హ్యూమనాయిడ్ రోబోను అభివృద్ధి చేసింది.
కేవలం మూడు నెలల వ్యవధిలోనే ఈ రోబో ప్రోటోటైప్‌ను రూపొందించినట్లు సమాచారం. మెటా సీఈఓ మార్క్ జుకర్‌బర్గ్ నేతృత్వంలో చేపట్టిన ఈ ప్రాజెక్టు ద్వారా, సంస్థకు చెందిన ఏఐ ఏజెంట్ ‘మ్యూజ్‌’కు భవిష్యత్తులో భౌతిక రూపాన్ని అందించాలనే లక్ష్యంతో పరిశోధనలు జరుగుతున్నాయి. ప్రస్తుతం ప్రయోగ దశలో ఉన్న మ్యాక్స్‌.. సాధారణ ఏఐ చాట్‌బాట్లకు భిన్నంగా నేరుగా మనుషులతో సంభాషించేలా రూపొందించబడింది.
ఐదు అడుగుల ఎత్తు.. ప్రత్యేకమైన డిజైన్
మ్యాక్స్‌ రోబో సుమారు ఐదు అడుగుల ఎత్తు, 48 కిలోల బరువు కలిగి ఉన్నట్లు తెలుస్తోంది. ఇందులో ఐదు వేళ్లతో కూడిన చేతులు, మాట్లాడేందుకు స్పీకర్లు, ముఖ కవళికలను ప్రదర్శించేందుకు ప్రత్యేక స్క్రీన్‌ను ఏర్పాటు చేశారు.
ఫోరియర్‌ రూపొందించిన రోబోను యథాతథంగా ఉపయోగించకుండా, మెటా తన అవసరాలకు అనుగుణంగా పలు మార్పులు చేసినట్లు సమాచారం. రోబో ఎత్తు, డిజైన్, తల, కెమెరాలు, చేతులు, పాదాల నిర్మాణంలో ప్రత్యేక మార్పులు చేపట్టింది. దీంతో మనుషులతో సహజంగా సంభాషించగలిగేలా దీన్ని తీర్చిదిద్దే ప్రయత్నం చేసింది.
దూరం నుంచే గొంతు, చేతి సైగలను గుర్తించే సామర్థ్యం
మ్యాక్స్‌ రోబోలో కొన్ని ప్రత్యేక సామర్థ్యాలను అభివృద్ధి చేయాలని మెటా లక్ష్యంగా పెట్టుకుంది. సుమారు ఐదు మీటర్ల దూరం నుంచి మనిషి గొంతును గుర్తించడం, మూడు మీటర్ల దూరం నుంచి చేతి సైగలను అర్థం చేసుకోవడం వంటి లక్ష్యాలను నిర్దేశించినట్లు తెలుస్తోంది.
అలాగే, మాట్లాడుతున్న వ్యక్తి కళ్లలోకి చూస్తూ సంభాషించేలా దీన్ని రూపొందిస్తున్నారు. తాను వింటున్నప్పుడు, ఆలోచిస్తున్నప్పుడు, మాట్లాడుతున్నప్పుడు లేదా ఏదైనా విషయం అర్థం కానప్పుడు తన ముఖంలోని స్క్రీన్‌పై సంకేతాలను ప్రదర్శించగలదు. చిన్న వస్తువులు, బొమ్మలను చేతులతో పట్టుకునే సామర్థ్యం కూడా దీనికి ఉంది.
ఈ రోబో పనితీరుకు ఎన్విడియా జెట్సన్ థోర్ (NVIDIA Jetson Thor) కంప్యూటింగ్ ప్లాట్‌ఫామ్‌ను ఉపయోగిస్తున్నట్లు సమాచారం.
మ్యాక్స్‌ రెండో వెర్షన్‌పై మెటా దృష్టి
మ్యాక్స్‌ తొలి ప్రోటోటైప్‌తోనే ఆగిపోకుండా, మెటా ఇప్పటికే రెండో వెర్షన్‌ అభివృద్ధిపై దృష్టి పెట్టినట్లు తెలుస్తోంది. తదుపరి మోడల్‌లో చేతుల పనితీరును మరింత మెరుగుపరచడం, మెట్లు ఎక్కేందుకు అదనపు సెన్సార్లను అమర్చడం వంటి మార్పులు చేయనున్నట్లు సమాచారం. దృశ్యాలను ప్రదర్శించేందుకు ప్రొజెక్టర్‌ను కూడా ఏర్పాటు చేసే అవకాశం ఉందని టెక్ వర్గాల్లో ప్రచారం జరుగుతోంది.
ప్రస్తుతం ఈ రోబోలను వాణిజ్యపరంగా విక్రయించే ప్రణాళిక లేదని, అంతర్గత పరిశోధనల కోసమే అభివృద్ధి చేస్తున్నామని మెటా ప్రతినిధి వెల్లడించినట్లు సమాచారం. అయితే, భవిష్యత్తులో వీటిని పూర్తిస్థాయి ఉత్పత్తులుగా మార్కెట్లోకి తీసుకురావడానికి ఈ ప్రయోగాలు ఉపయోగపడవచ్చని టెక్ పరిశ్రమలో అంచనాలు వ్యక్తమవుతున్నాయి.
హ్యూమనాయిడ్ రోబోల రంగంలో పెరుగుతున్న పోటీ
ప్రపంచవ్యాప్తంగా హ్యూమనాయిడ్ రోబోటిక్స్ రంగంలో పలు టెక్ కంపెనీలు పోటీపడుతున్నాయి. ఎలాన్ మస్క్‌కు చెందిన టెస్లా ‘ఆప్టిమస్‌’, ఫిగర్ సంస్థ రూపొందిస్తున్న రోబోలు, 1X టెక్నాలజీస్‌కు చెందిన ‘నియో’ వంటి ప్రాజెక్టులు ఈ రంగంలో కొనసాగుతున్నాయి. ఈ నేపథ్యంలో మెటా కూడా తన పరిశోధనలను వేగవంతం చేస్తోంది.
మరోవైపు, అమెరికా–చైనా మధ్య ఏఐ, అధునాతన సాంకేతికతల విషయంలో పోటీ కొనసాగుతున్న సమయంలో మెటా చైనాకు చెందిన ఫోరియర్‌తో భాగస్వామ్యం కావడం ప్రాధాన్యం సంతరించుకుంది. జాతీయ భద్రతా కారణాలతో చైనా రోబోటిక్స్ ఉత్పత్తులపై అమెరికాలో ఆంక్షలు, పరిమితులపై చర్చలు జరుగుతున్న నేపథ్యంలో ఈ భాగస్వామ్యం మరింత ఆసక్తికరంగా మారింది.
మొత్తంగా, ఏఐని డిజిటల్ ప్రపంచానికే పరిమితం చేయకుండా మనుషులతో నేరుగా సంభాషించే భౌతిక రూపాల్లోకి తీసుకురావాలన్న మెటా ప్రయత్నాల్లో ‘మ్యాక్స్‌’ ఒక కీలక ప్రయోగంగా నిలుస్తోంది. అయితే, ఈ రోబో ఎప్పుడు పూర్తిస్థాయి ఉత్పత్తిగా అందుబాటులోకి వస్తుందనే దానిపై ఇంకా స్పష్టత లేదు.