DNews:03 Dec:హైదరాబాద్ – హయత్ నగర్ ప్రాంతంలో ఏడేళ్ల మూగ బాలుడు ప్రేమ్చంద్పై వీధి కుక్కలు దాడి చేసి తీవ్రంగా గాయపరిచిన ఘటనపై తెలంగాణ ముఖ్యమంత్రి రేవంత్ రెడ్డి తీవ్రంగా స్పందించారు. ఢిల్లీలో ఉన్నప్పటికీ, ఈ వార్త తెలుసుకుని చలించిపోయిన సీఎం, అధికారులకు కీలక ఆదేశాలు జారీ చేశారు.
ముఖ్యమంత్రి రేవంత్ రెడ్డి ఈ ఘటనపై తీవ్ర ఆవేదన వ్యక్తం చేస్తూ కింది ఆదేశాలు ఇచ్చారు:గాయపడిన బాలుడు ప్రేమ్చంద్కు వెంటనే మెరుగైన వైద్యం మరియు తక్షణ ఆర్థిక సాయం అందించాలి.స్థానిక జీహెచ్ఎంసీ కమిషనర్ స్వయంగా బాలుడిని పరామర్శించడంతో పాటు బాధిత కుటుంబాన్ని కలిసి, వారి బాగోగులు పరిశీలించి ప్రభుత్వ పరంగా ఆదుకోవాలి.గత అనుభవాలను దృష్టిలో ఉంచుకుని, అధికారులు తక్షణం వీధి కుక్కల కట్టడిపై చర్యలు చేపట్టాలి. ఇలాంటి దురదృష్టకర ఘటనలు భవిష్యత్తులో పునరావృతం కాకుండా చూడాలని సూచించారు.బాలుడు త్వరగా కోలుకోవాలని సీఎం ఆకాంక్షించారు
బాధిత బాలుడు: ప్రేమ్చంద్ (7), పుట్టుకతోనే మూగవాడు.ప్రేమ్చంద్ తల్లిదండ్రులు తిరుపతిరావు, చంద్రకళ (ప్రకాశం జిల్లా వాసులు) ఉపాధి కోసం వచ్చి హయత్ నగర్, శివగంగ కాలనీలో నివాసం ఉంటున్నారు.మంగళవారం ఉదయం తల్లి తాగునీరు పడుతుండగా, ప్రేమ్చంద్ ఇంట్లో నుంచి ఆడుకుంటూ బయటకు వచ్చాడు. ఆ సమయంలో 10 నుంచి 12 వీధి కుక్కల గుంపు ఒక్కసారిగా బాలుడిపై దాడి చేసింది.ఈ దాడిలో బాలుడి చెవి ఊడిపోయింది. మెడ, చెవి, నడుము, పిక్కలతో సహా శరీరమంతా తీవ్ర గాయాలై, రక్తసిక్తమైంది.స్థానికులు గమనించి కుక్కల్ని తరిమేయడంతో బాలుడిని వెంటనే నిలోఫర్ ఆస్పత్రికి తరలించారు.
వీధి కుక్కల బెడదపై స్థానికులు తీవ్ర ఆగ్రహం వ్యక్తం చేశారు. ఫిర్యాదులు చేసినా జీహెచ్ఎంసీ అధికారులు నిర్లక్ష్యం చేస్తున్నారని మండిపడ్డారు. బాలుడి వైద్యానికి సంబంధించిన ఖర్చులన్నీ జీహెచ్ఎంసీ భరించాలని వారు డిమాండ్ చేశారు. నగరంలో తరచుగా ఇలాంటి ఘటనలు జరుగుతున్నా అధికారులు స్పందించడం లేదని, తక్షణమే కుక్కల నియంత్రణకు చర్యలు తీసుకోవాలని కోరారు.