ఈసారి సంక్రాంతి పండుగ ఎప్పుడు వచ్చింది..? పుణ్యస్నానాల సమయం ఎప్పుడంటే..

D Spiritual: Jan 5: మకర సంక్రాంతి పండుగను అత్యంత పవిత్రమైనదిగా, మతపరంగా మరియు సాంస్కృతికంగా విశేష ప్రాధాన్యం కలిగిన పండుగగా భావిస్తారు. ప్రతి సంవత్సరం సూర్యుడు మకర రాశిలోకి ప్రవేశించిన సందర్భంలో ఈ పండుగను ఘనంగా జరుపుకుంటారు. ఈ రోజున దానధర్మాలు, పవిత్ర స్నానాలు, ప్రార్థనలు చేయడం ఎంతో శుభప్రదంగా భావిస్తారు.

అయితే ఈసారి మకర సంక్రాంతి తేదీ విషయంలో కొంత గందరగోళం నెలకొంది. అంతేకాకుండా ఈ ఏడాది ఏకాదశి తిథి మకర సంక్రాంతితో కలసి రావడం వల్ల భక్తుల్లో మరింత ఆసక్తి ఏర్పడింది. అందుకే ఈ సంవత్సరం మకర సంక్రాంతి ఎప్పుడు జరుపుకోవాలి అనే విషయంపై తెలుసుకోవడం అవసరం.

సూర్యుడు ఉత్తరాయణ దిశగా కదలడం ప్రారంభించినప్పుడు పండుగల సీజన్ ఆరంభమవుతుంది. ఈ ఉత్సవ కాలం సాధారణంగా జనవరి 14 లేదా 15 తేదీల్లో జరుపుకునే మకర సంక్రాంతితో ప్రారంభమవుతుంది. దేశవ్యాప్తంగా ఈ పండుగను విభిన్న పేర్లు, సంప్రదాయాలతో జరుపుకుంటారు. మకర సంక్రాంతి చీకటి నుండి వెలుగులోకి, చలి నుండి శక్తికి మార్పును సూచించే పర్వదినంగా భావిస్తారు.

సూర్యుడు ధనురాశి నుంచి మకర రాశిలోకి ప్రవేశించే ఈ రోజును సంక్రాంతిగా పరిగణిస్తారు. ఇది కేవలం ఒక పండుగ మాత్రమే కాకుండా ప్రకృతిలో చోటు చేసుకునే మార్పులకు ప్రతీకగా నిలుస్తుంది. భారతీయ సంప్రదాయంలో ఈ కాలం అత్యంత శుభప్రదమైనదిగా భావిస్తారు.

ఈ సమయంలో కొత్త పంట చేతికి రావడంతో రైతులంతా ఆనందోత్సాహాలతో ఉంటారు. ఇళ్లలో ధాన్య రాశులు నిండి సమృద్ధి కనిపిస్తుంది. అందుకే నువ్వులు, బెల్లం కలిపిన తీపి వంటకాలు, ఇంటి ముందు రంగవల్లులు, గోబ్భిళ్లు, చిన్నారులకు పోసే భోగి పళ్లు, కొత్త అల్లులు, ఆకాశంలో ఎగిరే రంగురంగుల గాలిపటాలు ఇలా మకర సంక్రాంతి అన్ని విధాలా ఆనందాన్ని పంచుతుంది.

సంక్రాంతి పండుగను మూడు రోజుల పాటు జరుపుకుంటారు. మొదటి రోజు భోగి, రెండో రోజు మకర సంక్రాంతి, మూడో రోజు కనుమ. ఈ మూడు రోజుల పండుగల సందడి గ్రామాల్లోనూ, పట్టణాల్లోనూ ప్రత్యేకంగా కనిపిస్తుంది.

పంచాంగం ప్రకారం జనవరి 13 (మంగళవారం) భోగి పండుగగా, జనవరి 14 (బుధవారం) మకర సంక్రాంతిగా, జనవరి 15 (గురువారం) కనుమ పండుగగా జరుపుకుంటారు. జనవరి 14న సూర్యుడు మకర రాశిలోకి మధ్యాహ్నం 3:13 గంటలకు ప్రవేశించి సాయంత్రం 5:45 వరకు ఆ స్థితిలో ఉంటాడు. ఈ కాలవ్యవధి మొత్తం 2 గంటల 32 నిమిషాలు.

మకర సంక్రాంతి మహా పుణ్యకాలం మధ్యాహ్నం 3:13 నుంచి సాయంత్రం 4:58 వరకు ఉంటుందని పండితులు పేర్కొంటున్నారు. ఈ సమయంలో పవిత్ర స్నానాలు, సూర్యుడికి అర్పణలు, దానధర్మాలు, శ్రద్ధా ఆచారాలు, ఉపవాస విరమణ చేయడం అత్యంత శుభప్రదమని శాస్త్రాలు చెబుతున్నాయి.