D Spiritual: Nov 14: ఆలయాలకు వెళ్లినప్పుడు కొన్ని ముఖ్యమైన నియమాలు తప్పనిసరిగా పాటించాలని శాస్త్రాలు చెబుతున్నాయి. ఇంటికి దగ్గరలోనున్న ఆలయం అయినా, దూరమై ఉన్న దేవాలయం అయినా, ప్రవేశించే ముందు కాళ్లు, చేతులు, ముఖం శుభ్రం చేసుకోవాలి. ఈ శుభ్రత మనసు, శరీరం రెండింటికీ పవిత్రతను అందిస్తుందని నమ్మకం. ఉపవాసంతో దేవాలయానికి వెళ్లేవారు ఇంట్లో చిన్న పిల్లలు ఉన్నట్లయితే వారికి ముందుగా తినిపించి లేదా తాగించి తీసుకెళ్లడం మంచిదని సూచిస్తారు.
ఆలయానికి పూజా సామగ్రి తీసుకెళ్లడం ఒక శుభ సూచకం. టెంకాయ, పూలు, పళ్లు, ఆకులు, వక్కతో పాటు ఒక రూపాయి బిళ్ళను దేవునికి సమర్పిస్తే మన కోరికలు నెరవేరతాయని అంటారు. అయితే ప్రతి సారి ఆలయానికి వెళ్లేటప్పుడు పూజా సామగ్రి తీసుకురావాల్సిన ఖచ్చితమైన నిర్బంధం లేదని కూడా చెబుతారు. భక్తి మరియు పవిత్రత ఉన్నచోటే పూజా ఫలితం ఉంటుందని నమ్మకం.
ఏ దేవాలయానికి వెళ్లినా ముందుగా విఘ్నేశ్వరుడిని దర్శించుకోవడం అత్యంత ముఖ్యమైనది. తర్వాత మిగతా దేవతలను దర్శించుకోవాలి. కొంతమంది మూలవిరాట్ వద్ద ఎక్కువగా భక్తులు ఉన్నారని ముందుగా నవగ్రహాలను దర్శించే పొరపాటు చేస్తారు. కానీ ఇలాంటి విధానం శాస్త్రోక్తం కాదని పండితులు చెబుతున్నారు. ఎక్కడైనా ముందు ప్రధాన దేవుడిని దర్శించి, తిరిగి వచ్చే సమయంలో నవగ్రహాలను దర్శించుకోవడం మంచిదని సూచిస్తున్నారు.
నవగ్రహాలకు నమస్కారం చేసే విషయంలో కూడా ఒక ప్రత్యేక నమ్మకం ఉంది. ఆలయం నుంచి బయటకు వస్తూ కాశీ నవగ్రహాలకు వంగి నమస్కారం చేయకూడదని చెబుతారు. అలాగే దేవాలయం నుంచి ఇంటికి వచ్చిన వెంటనే కాళ్లు, చేతులు శుభ్రం చేసుకోవడం మంచిదికాదని విశ్వసిస్తారు. ఆలయ పవిత్రతను కొద్ది సేపు అలాగే నిలుపుకోవాలి అని భావిస్తారు. కొంత సమయం తర్వాత శరీరాన్ని శుభ్రం చేసుకోవడం శ్రేయస్కరం.
ఈ చిన్న చిన్న నియమాలు పాటించడం ద్వారా పూజా ఫలితం పెరుగుతుందని, జీవితంలో శాంతి, శుభం చేరుతాయని పండితులు సూచిస్తున్నారు. ఆలయ ప్రవేశం నుంచి బయటకు వచ్చే వరకు శ్రద్ధ, గౌరవం, నియమాలు పాటించడం ఆధ్యాత్మికంగా ఎంతో ప్రధానమని విశ్వసిస్తారు.