ప్రస్తుతం దేశవ్యాప్తంగా ఈ20 పెట్రోల్ గురించి తీవ్ర చర్చ జరుగుతోంది. ఈ20 పెట్రోల్ వాడకం వల్ల మైలేజీ తగ్గిపోతుందని, వాహనాలు పాడవుతాయంటూ జరుగుతున్న ప్రచారాన్ని బీజేపీ ఎంపీ కొండా విశ్వేశ్వర్ రెడ్డి తీవ్రంగా ఖండించారు. ఈ క్రమంలోనే ఇథనాల్ కలిపిన పెట్రోల్ వల్ల మన రైతులకు, ఫ్యాక్టరీలకు, వాతావరణానికి లాభమని.. పెట్రోల్ వల్ల విదేశాలకు లబ్ధి చేకూరి, వాతావరణానికి నష్టం కలిగిస్తుందని తెలిపారు. ఈ నేపథ్యంలోనే పెట్రోల్, ఇథనాల్ మండించి ప్రయోగం చేసి మరీ.. ఆయన వివరించారు.
కేంద్ర ప్రభుత్వం పెట్రోల్‌లో 20 శాతం ఇథనాల్ కలిపి.. ఈ20 పెట్రోల్ దేశవ్యాప్తంగా విక్రయిస్తున్న సంగతి తెలిసిందే. అయితే ఈ20 పెట్రోల్ వాడటం వల్ల వాహనాలు పాడవుతున్నాయని, మైలేజీ తగ్గిపోతోందనే వాదనలు వినిపిస్తున్నాయి. ఈ క్రమంలోనే దేశవ్యాప్తంగా వాహనదారుల్లో తీవ్ర ఆందోళనలు వెల్లువెత్తుతున్నాయి. అయితే ఈ20 పెట్రోల్‌పై జరుగుతున్న ప్రచారాన్ని ఖండించిన బీజేపీ సీనియర్ నేత, చేవేళ్ల ఎంపీ కొండా విశ్వేశ్వర్ రెడ్డి.. ఆయనే స్వయంగా ఒక ప్రయోగం చేసి.. ఇథనాల్ పెట్రోల్ మంచిదని తేల్చి చెప్పారు.
దేశంలో ఈ20 పెట్రోల్ గురించి దుష్ప్రచారం జరుగుతోందని.. దాన్ని ప్రజలకు వివరించేందుకే తాను ఈ ప్రయోగం చేస్తున్నట్లు వెల్లడించారు. ఈ క్రమంలోనే తన వాహనం నుంచి తీసిన కొంత పెట్రోల్‌ను వినియోగించారు. ఇక ల్యాబ్‌లో కొనుగోలు చేసిన ఇథనాల్‌ను తీసుకొచ్చారు. విదేశాల నుంచి దిగుమతి చేసుకున్న క్రూడాయిల్‌ నుంచి పెట్రోల్ తయారు అవుతుందని.. ఇక ఈ ఇథనాల్ మన దేశంలో పండిన పంటల నుంచి తయారు చేస్తారని వివరించారు.
ఈ నేపథ్యంలోనే ఒక గిన్నెలో కొంత పెట్రోల్, మరో గిన్నెలో ఇథనాల్ పోసిన ఎంపీ విశ్వేశ్వర్ రెడ్డి.. ఆ రెండు గిన్నెల్లో అగ్గిపుల్ల అంటించి మంట పెట్టారు. అయితే పెట్రోల్ ఉన్న గిన్నెలోని మంట నుంచి పొగ వెలువడింది. అదే సమయంలో ఇథనాల్ ఉన్న గిన్నెలోని మంట నుంచి ఎలాంటి పొగ వెలువడకుండా కేవలం మంట మాత్రమే రావడం కనిపించింది. దీంతో వాహనాల్లో పెట్రోల్ వాడితో పొగ బయటికి వచ్చి.. వాతావరణం కాలుష్యం అవుతుందని ఎంపీ కొండా వెల్లడించారు. అదే ఇథనాల్ వాడటం వల్ల అసలు పొగే రాదని పేర్కొన్నారు.