హైదరాబాద్ కేంద్రంగా భారీ సైబర్ మోసం
హైదరాబాద్ కేంద్రంగా సాగిన అంతర్జాతీయ సైబర్ మోసం వ్యవహారం సంచలనం సృష్టించింది. అమెరికాకు చెందిన దాదాపు 20 లక్షల మంది ఫోన్ నంబర్లు, వ్యక్తిగత వివరాలను ఉపయోగించి నకిలీ కాల్ సెంటర్ల ద్వారా మోసాలకు పాల్పడినట్లు ఎన్‌ఫోర్స్‌మెంట్ డైరెక్టరేట్ (ED) గుర్తించింది. ఈ ముఠా 927 లావాదేవీల ద్వారా సుమారు రూ.261 కోట్లు వసూలు చేసినట్లు దర్యాప్తులో వెల్లడైంది. ముఖ్యంగా అమెరికాలోని వృద్ధులను లక్ష్యంగా చేసుకుని ఈ మోసాలకు పాల్పడినట్లు అధికారులు తెలిపారు.
అమెరికా ప్రభుత్వ అధికారులమంటూ బెదిరింపులు
ఈ ముఠా సభ్యులు అమెరికా డ్రగ్ ఎన్‌ఫోర్స్‌మెంట్ అడ్మినిస్ట్రేషన్ (DEA), న్యాయశాఖ, ఫెడరల్ ట్రేడ్ కమిషన్, ట్రెజరీ విభాగాల అధికారులమంటూ బాధితులకు ఫోన్ చేసేవారు. వారి బ్యాంకు ఖాతాలు నేర కార్యకలాపాలకు ఉపయోగపడుతున్నాయని, డ్రగ్స్ అక్రమ రవాణా లేదా మనీలాండరింగ్ కేసుల్లో చిక్కుకున్నారని భయపెట్టేవారు.
అరెస్టు చేస్తామని, ఆస్తులను స్వాధీనం చేసుకుంటామని బెదిరించి డబ్బు, బంగారం వసూలు చేసేవారు. బాధితులను నమ్మించేందుకు నకిలీ గుర్తింపు కార్డులు, అధికారిక బ్యాడ్జీలు, సీజ్ నోటీసులు, కోర్టు ఉత్తర్వులను కూడా ఉపయోగించినట్లు ఈడీ వెల్లడించింది.
927 లావాదేవీల్లో రూ.261 కోట్ల వసూళ్లు
2025 జూలై నుంచి 2026 సెప్టెంబర్ మధ్య ఈ ముఠా 927 లావాదేవీల ద్వారా 27.39 మిలియన్ డాలర్లు, అంటే సుమారు రూ.261 కోట్లు వసూలు చేసినట్లు ఈడీ గుర్తించింది. ఇప్పటివరకు 549 మంది అమెరికన్ బాధితులు మోసపోయినట్లు దర్యాప్తులో తేలింది. మొత్తం 6,463 అమెరికా ఫోన్ నంబర్లకు కాల్స్ లేదా సందేశాలు పంపినట్లు అధికారులు గుర్తించారు.
దాదాపు 20 లక్షల మంది అమెరికన్ల పేర్లు, ఫోన్ నంబర్లు, చిరునామాలు, వయసులతో కూడిన డేటాబేస్‌ను నిందితులు సేకరించారు. ఈ డేటాను ఉపయోగించి ఆటో డయలర్ల ద్వారా పెద్ద ఎత్తున ఫోన్ కాల్స్ చేసినట్లు వెల్లడైంది. జర్మనీ, ఫిన్లాండ్‌లోని సర్వర్లను ఇందుకోసం వినియోగించినట్లు దర్యాప్తులో గుర్తించారు.
భారత్, అమెరికా, దుబాయ్, హాంకాంగ్‌లకు విస్తరించిన నెట్‌వర్క్
ఈ మోసాల ద్వారా వసూలు చేసిన డబ్బును భారత్‌కు తరలించేందుకు నిందితులు పలు మార్గాలను ఉపయోగించినట్లు ఈడీ తెలిపింది. మ్యూల్ బ్యాంకు ఖాతాలు, క్రిప్టోకరెన్సీ, హవాలా, అంగడియా మార్గాల ద్వారా నగదును తరలించినట్లు గుర్తించింది.
అమెరికాలోని బాధితుల ఇళ్లకు వెళ్లి నగదు, బంగారం సేకరించేందుకు ప్రత్యేక నెట్‌వర్క్‌ను ఏర్పాటు చేసుకున్నట్లు కూడా అధికారులు వెల్లడించారు. కొందరి ద్వారా కొరియర్ పార్సిళ్లను స్వీకరించగా, మరికొందరితో గిఫ్ట్ కార్డులు కొనిపించి, క్రిప్టోకరెన్సీ రూపంలో డబ్బును తరలించినట్లు దర్యాప్తులో బయటపడింది.
తాజాగా మరో నలుగురి అరెస్ట్.. ఏడుగురికి చేరిన సంఖ్య
ఈ కేసులో ఈడీ తాజాగా హర్షిల్ నయన్‌భాయ్ రావల్, జస్వంత్ సింగ్, చేతన్ ముంజల్, ప్రణవ్ పిఠాడియాలను అరెస్టు చేసింది. వీరిని నాంపల్లిలోని ప్రత్యేక పీఎంఎల్‌ఏ కోర్టులో హాజరుపరచగా న్యాయస్థానం జ్యుడీషియల్ కస్టడీకి పంపింది.
ఇప్పటికే ఈ కేసులో వికాస్ నిమార్, తారాచంద్ నిమార్, మహమ్మద్ ఇర్ఫాన్ అన్సారీలను అధికారులు అరెస్టు చేశారు. తాజా అరెస్టులతో ఈ కేసులో అరెస్టయిన వారి సంఖ్య ఏడుకు చేరింది.
రూ.400 కోట్ల ఆస్తులపై ఈడీ దర్యాప్తు
ఈ ముఠాకు చెందినట్లు అనుమానిస్తున్న ఆస్తులు, బంగారం, వాహనాలు, వ్యాపార పెట్టుబడులపై ఈడీ విచారణ కొనసాగిస్తోంది. నిందితులకు సంబంధించిన సుమారు రూ.400 కోట్ల విలువైన ఆస్తుల వివరాలను అధికారులు పరిశీలిస్తున్నారు. సోదాల్లో స్వాధీనం చేసుకున్న డిజిటల్ పరికరాలు, వాట్సాప్ చాట్లు, ఆర్థిక లావాదేవీల రికార్డులు, క్రిప్టో వాలెట్లను విశ్లేషిస్తున్నారు.
అంతర్జాతీయ స్థాయిలో విస్తరించిన ఈ సైబర్ మోసాల వెనుక ఇంకా ఎవరెవరు ఉన్నారు? డబ్బు ఎక్కడెక్కడికి తరలించారు? అనే అంశాలపై ఈడీ దర్యాప్తు కొనసాగుతోంది.