DNews:31 Dec: హైదరాబాద్లోని మాదాపూర్లో నిన్న (డిసెంబర్ 30) రాత్రి ఒక విషాదకరమైన హిట్ అండ్ రన్ ఘటన చోటుచేసుకుంది. మాదాపూర్ పర్వత్నగర్ సిగ్నల్ వద్ద విధుల్లో ఉన్న ట్రాఫిక్ హోంగార్డు నయీం (45)ను అతివేగంగా వచ్చిన ఒక కారు ఢీకొట్టి ఆపకుండా వెళ్ళిపోయింది. ఈ ప్రమాదంలో నయీం తీవ్రంగా గాయపడ్డారు. ముఖ్యంగా ఆయన కాలు విరిగినట్లు వైద్యులు నిర్ధారించారు.
ప్రమాదం జరిగిన వెంటనే స్థానికులు, తోటి సిబ్బంది స్పందించి ఆయనను చికిత్స నిమిత్తం సమీపంలోని ప్రైవేట్ ఆసుపత్రికి తరలించారు. ప్రస్తుతం ఆయన పరిస్థితి నిలకడగా ఉన్నట్లు తెలుస్తోంది. ఈ విషయం తెలుసుకున్న ట్రాఫిక్ డీసీపీ సాయి మనోహర్, అడిషనల్ డీసీపీ హనుమంతురావు ఆసుపత్రికి వెళ్లి బాధితుడిని పరామర్శించి, మెరుగైన వైద్యం అందించాలని డాక్టర్లను కోరారు. మాదాపూర్ పోలీసులు ఈ ఘటనపై హిట్ అండ్ రన్ కేసు నమోదు చేశారు. సిగ్నల్ వద్ద ఉన్న సీసీటీవీ ఫుటేజీని పరిశీలించి, పరారైన కారు మరియు డ్రైవర్ను గుర్తించేందుకు గాలింపు చర్యలు చేపట్టారు.కొత్త సంవత్సరం వేడుకల బందోబస్తు కోసం పోలీసులు సిద్ధమవుతున్న తరుణంలో, విధుల్లో ఉన్న సిబ్బందిపై ఇలాంటి ప్రమాదం జరగడం కలకలం రేపింది.