DNews:1 NOV:దేశ రాజధాని ఢిల్లీలో వాయు కాలుష్యం రోజురోజుకీ పెరుగుతోంది. శనివారం ఉదయం ఢిల్లీ-ఎన్సీఆర్‌ ప్రాంతంలో గాలి నాణ్యత “పూర్‌” కేటగిరీలో నమోదైంది. సెంట్రల్‌ పొల్యూషన్‌ కంట్రోల్‌ బోర్డ్‌ (CPCB) సమాచారం ప్రకారం ఉదయం 8 గంటల సమయానికి ఢిల్లీలో ఓవరాల్‌ ఏక్యూఐ (Air Quality Index – AQI) 245 గా నమోదైంది.
వాజీపూర్‌లో అత్యధికంగా 328, బావనా 301, జహంగిరిపురి 300, చాందినీ చౌక్‌ 299, ఆర్కే పురం, ఆనంద్‌ విహార్‌ 298, సిరిఫోర్ట్‌ 295, అశోక్‌ విహార్‌ 287, రోహిణి 281, ఐటీవో 275 వద్ద గాలి నాణ్యత అధ్వాన్నంగా నమోదైంది. కొన్ని ప్రాంతాల్లో మాత్రం గాలి నాణ్యత కొంత మెరుగ్గా ఉంది — ఆయా నగర్‌లో 182, లోధి రోడ్‌లో 150, ఐజీఐ ఎయిర్‌పోర్ట్‌ టెర్మినల్‌-3 వద్ద 188 ఏక్యూఐ నమోదైంది.
AQI కేటగిరీల వివరణ:
- 0–100: గాలి నాణ్యత బాగుంది
- 101–200: మధ్యస్థ స్థాయి
- 201–300: అధ్వాన్నం
- 301–400: చాలా అధ్వాన్నం
- 401–500: తీవ్ర కాలుష్యం
ఎయిర్ క్వాలిటీ అండ్‌ వెదర్‌ ఫోర్‌కాస్టింగ్‌ అండ్‌ రిసెర్చ్‌ సంస్థ ప్రకారం, AQI 447 దాటితే “తీవ్ర కాలుష్య స్థాయి”గా పరిగణిస్తారు.
వైరల్‌ ఇన్ఫెక్షన్లు పెరుగుతున్నాయి
కాలుష్యం ప్రభావంతో ఢిల్లీలో ప్రజలు ఆరోగ్య సమస్యలతో ఇబ్బంది పడుతున్నారు. లోకల్‌ సర్కిల్స్‌ నిర్వహించిన సర్వే ప్రకారం, ఢిల్లీలో 75% కుటుంబాల్లో కనీసం ఒకరు వైరల్‌ ఇన్ఫెక్షన్‌‌తో బాధపడుతున్నారు. సెప్టెంబర్‌లో 56% కుటుంబాల్లో రోగులు ఉండగా, అక్టోబర్‌లో ఈ సంఖ్య గణనీయంగా పెరిగిందని నివేదిక వెల్లడించింది.