ప్రవళిక మృతితో ఆర్టీసీలో కీలక మార్పులు
తెలంగాణ రాష్ట్ర రోడ్డు రవాణా సంస్థ (TGSRTC) ప్రయాణికులు, సిబ్బంది భద్రతకు సంబంధించి కీలక నిర్ణయం తీసుకుంది. విధుల్లో ఉన్న మహిళా కండక్టర్ గుండ్ల ప్రవళిక మృతి ఘటన నేపథ్యంలో బస్సుల నిర్వహణలో కొత్త నిబంధనలు అమలు చేయాలని నిర్ణయించింది. ఇకపై ప్యాసింజర్ డోర్లు ఉన్న బస్సులు ప్రయాణించే సమయంలో తప్పనిసరిగా తలుపులు మూసి ఉంచాలని ఆదేశాలు జారీ చేసింది.
డోర్లు పనిచేస్తున్నాయో లేదో తనిఖీ
ఆర్టీసీ మెకానికల్ ఇంజినీరింగ్ విభాగం ఈ మేరకు అన్ని డిప్యూటీ రీజినల్ మేనేజర్లకు సూచనలు పంపించింది. తమ పరిధిలోని బస్సుల్లో ప్యాసింజర్ డోర్లు సక్రమంగా పనిచేస్తున్నాయో లేదో తనిఖీ చేయాలని ఆదేశించింది. బస్సులు కదులుతున్న సమయంలో తలుపులు తెరిచి ఉండకుండా చర్యలు తీసుకోవాలని స్పష్టం చేసింది. భద్రతా నిబంధనలు క్షేత్రస్థాయిలో కచ్చితంగా అమలయ్యేలా చూడాలని అధికారులకు సూచించింది.
ప్రవళిక మృతి ఘటనతో కలకలం
మణుగూరు ఆర్టీసీ డిపోలో కండక్టర్‌గా పనిచేస్తున్న 24 ఏళ్ల గుండ్ల ప్రవళిక అక్టోబర్ 25న విధుల్లో ఉండగా ఈ విషాద ఘటన చోటుచేసుకుంది. మణుగూరు నుంచి భద్రాచలం వెళ్తున్న పల్లె వెలుగు బస్సులో టికెట్, చిల్లర విషయంలో ఓ మహిళా ప్రయాణికురాలితో ఆమెకు వాగ్వాదం జరిగినట్లు సమాచారం. ఈ క్రమంలో ప్రయాణికురాలు ప్రవళికను కదులుతున్న బస్సు నుంచి బయటకు తోసినట్లు ఆరోపణలు వచ్చాయి.
ఈ ఘటనలో తీవ్రంగా గాయపడిన ప్రవళికను తొలుత స్థానిక ఆసుపత్రికి, అనంతరం మెరుగైన చికిత్స కోసం హైదరాబాద్‌కు తరలించారు. అయితే దాదాపు పది రోజుల పాటు చికిత్స పొందిన ఆమె నవంబర్ 3న రాత్రి మృతి చెందారు. ఈ ఘటన ఆర్టీసీ సిబ్బందిలో తీవ్ర ఆవేదనకు దారితీసింది.
భద్రతా చర్యలకు ఆర్టీసీ ప్రాధాన్యం
ప్రవళిక మృతి నేపథ్యంలో ఇలాంటి ఘటనలు పునరావృతం కాకుండా చర్యలు తీసుకోవాలని ఆర్టీసీ యాజమాన్యం నిర్ణయించింది. బస్సుల్లో తలుపుల నిర్వహణపై ప్రత్యేక దృష్టి పెట్టడంతో పాటు, ప్రయాణ సమయంలో భద్రతా నిబంధనలు పాటించేలా పర్యవేక్షణ చేపట్టనుంది. ఈ నిర్ణయం వల్ల ప్రయాణికులతో పాటు విధుల్లో ఉండే డ్రైవర్లు, కండక్టర్ల భద్రత కూడా మెరుగుపడుతుందని భావిస్తున్నారు.