DNews:02 Dec:తెలంగాణలో స్థానిక ఎన్నికలు దగ్గరపడుతుండటంతో గ్రామాల్లో రాజకీయ వేడి పెరిగింది. ఎన్నో ప్రాంతాల్లో ఏకగ్రీవ ఎంపికలు జరగగా, మరికొన్ని గ్రామాల్లో సర్పంచ్ అభ్యర్థులు ప్రబలంగా ప్రచారం చేస్తూ ఓటర్లను ఆకర్షించేందుకు ప్రయత్నిస్తున్నారు. ఈ మేరకు డబ్బు, బహుమతులు ఇచ్చే ఘటనలు కూడా చోటుచేసుకుంటున్నాయి.
అయితే సూర్యాపేట జిల్లాలోని ఆత్మకూరు (ఎస్) మండలంలోని రామన్నగూడెం గ్రామంలో ఓ కుటుంబం ప్రజలకు చూపు తిరిగేలా అడుగు వేసింది. “మా ఓట్లు అమ్మబడవు” అంటూ తమ ఇంటి గోడపై స్పష్టంగా వాల్ పెయింటింగ్ చేయించి ఎన్నికల సమయంలో డబ్బులు ఇచ్చే అలవాట్లకు షాక్ ఇచ్చింది.
ఆ ఇంటి యజమాని యల్లం కొండ వెంకట్ రెడ్డి కుటుంబ సభ్యులు అభ్యర్థుల నుంచి ఎలాంటి డబ్బులు, ఆఫర్లు తీసుకోబోమని స్పష్టం చేశారు. అంతేకాదు, తమ ఇంటి గోడపై పోస్టర్లు అతికించవద్దని, వారి ఇల్లు సీసీ కెమెరా పరిధిలో ఉందని, తమను ప్రభావితం చేయడానికి ప్రయత్నిస్తే చర్యలు తప్పవని కూడా హెచ్చరించారు.డబ్బుకు ఓటు వేసే సంస్కృతి పెరిగిపోయిన ఈ రోజుల్లో, స్వచ్ఛమైన ప్రజాస్వామ్యం కోసం ఈ కుటుంబం తీసుకున్న ఈ నిర్ణయం గ్రామంలోనే కాకుండా మొత్తం జిల్లాలో ఆదర్శంగా నిలిచింది.