D Spiritual: Dec 5: కొన్ని సందర్భాల్లో కుటుంబ జీవితంలో ఎదురయ్యే అవాంతరాలకు ఇంట్లో వాస్తు దోషం కూడా కారణమవుతుందని వాస్తు నిపుణులు చెబుతారు. కుటుంబంలో బలమైన బంధం కొనసాగాలంటే కొన్ని వాస్తు సూచనలు పాటించడం మంచిదిగా భావిస్తారు. భార్యాభర్తలు ఆగ్నేయ దిశను ముఖంగా చేసుకున్న గదిలో నివసించకూడదు, ఎందుకంటే అది సంబంధాల్లో ఉద్రిక్తతలు పెరగడానికి కారణం అవుతుందని వాస్తు శాస్త్రం చెబుతుంది. బెడ్‌రూమ్‌లో లేత రంగులు వాడటం మనసుకు మంచి ఆహ్లాదాన్ని కలిగిస్తుంది మరియు సానుకూల శక్తిని పెంచుతుంది. అలాగే ఇంట్లో చిందరవందరగా ఉండటం ప్రతికూల శక్తిని ఆకర్షించి కుటుంబ సభ్యుల మధ్య అసమ్మతి, వివాదాలకు దారితీయవచ్చు.
దంపతులు నిద్ర సమయంలో బెడ్‌రూమ్ తలుపు మూసి ఉంచడం మంచిదని సూచిస్తారు. భర్త మంచం కుడివైపున, భార్య ఎడమవైపున పడుకోవడం దాంపత్యంలో సౌహార్దం పెంచుతుందని వాస్తు చెబుతుంది. ఫ్యామిలీ ఫోటోను నైరుతి దిశలో ఉంచితే కుటుంబ బంధం బలపడుతుందని నమ్ముతారు. మంచం మీద కూర్చుని భోజనం చేయకూడదు; డైనింగ్ టేబుల్ వద్ద కలిసి భోజనం చేయడం కుటుంబ సభ్యులను దగ్గర చేస్తుంది.
ఇంటి గోడల్లో పగుళ్లు ఉంటే వెంటనే సరిచేయాలి, అవి సంబంధాల్లో కూడా పగుళ్లకు సంకేతంగా భావించబడతాయి. ఇంట్లో ఎక్కువ మొక్కలు ఉంచడం సానుకూల శక్తిని పెంచుతుంది, ముఖ్యంగా ఉత్తర దిశలో మొక్కలు ఉంచడం శ్రేయస్కరం. ఇవి కుటుంబంలో ప్రేమ, విశ్వాసం పెరగడంలో సహాయపడతాయి. బెడ్‌రూమ్‌లో అద్దం ఉంటే నిద్రపోతున్నప్పుడు దాంట్లో దంపతుల ప్రతిబింబం కనిపించకుండా చూసుకోవాలి. అలా కనిపిస్తే దాంపత్య సంబంధాలపై ప్రతికూల ప్రభావం ఉంటుందని చెబుతారు. అద్దాన్ని మార్చడం సాధ్యంకాకపోతే నిద్రపోయే సమయంలో దానిని వస్త్రంతో కప్పడం మంచిదిగా సూచిస్తారు.