D Spiritual: Feb 13: తిరుమల శ్రీ వేంకటేశ్వర స్వామివారి దర్శనానికి ప్రతిరోజూ వేలాదిమంది భక్తులు తరలివస్తుంటారు. స్వామివారిపై అపార భక్తి భావంతో వారు టీటీడీకి నగదు, బంగారం, వెండి వంటి విలువైన కానుకలతో పాటు వివిధ సేవా కార్యక్రమాలకు అవసరమైన వస్తువులను విరాళంగా సమర్పిస్తున్నారు. ఈ దానాలు తిరుమలలో భక్తులకు మెరుగైన సౌకర్యాలు కల్పించేందుకు ఉపయోగపడుతున్నాయి.
తాజాగా చెన్నైకు చెందిన జస్పెర్ అనే భక్తుడు టీటీడీకి ఏడు అత్యాధునిక బ్యాటరీ వాహనాలను విరాళంగా అందించారు. ఒక్కో వాహనం సుమారు రూ.7 లక్షల విలువ కలిగి ఉండగా, మొత్తం విలువ దాదాపు రూ.50 లక్షలు. ఈ వాహనాలను టీటీడీ అదనపు ఈవో వెంకయ్య చౌదరి ప్రత్యేక పూజల అనంతరం ప్రారంభించారు.
తిరుమలలో పర్యావరణ పరిరక్షణకు ప్రాధాన్యం ఇస్తూ శబ్ద కాలుష్యం లేని ఎలక్ట్రిక్ వాహనాలను వినియోగిస్తున్నారు. ఈ బ్యాటరీ వాహనాలు ఆలయ పరిసరాల్లో వృద్ధులు, దివ్యాంగులు, చిన్నపిల్లలతో వచ్చిన తల్లిదండ్రులకు ఉచితంగా అందుబాటులో ఉంటాయి. దర్శనానికి వచ్చే భక్తులు నడవడంలో ఇబ్బంది పడకుండా సౌకర్యవంతమైన రవాణా సదుపాయం కల్పించడమే ఈ సేవ లక్ష్యం. ఈ సేవా కార్యక్రమానికి ముందుకొచ్చిన దాతను టీటీడీ అధికారులు అభినందించారు.
ఇదిలా ఉండగా, శ్రీనివాసమంగాపురం శ్రీ కల్యాణ వేంకటేశ్వర స్వామివారి బ్రహ్మోత్సవాలు ఘనంగా కొనసాగుతున్నాయి. గోదా కల్యాణయాత్ర పేరిట ఆండాళ్ అమ్మవారి మాలలను గోవిందరాజస్వామి ఆలయం నుంచి ఊరేగింపుగా తీసుకువచ్చి స్వామివారికి అలంకరించారు. గురువారం స్వామివారు మోహినీ అవతారంలో భక్తులకు దర్శనమిచ్చారు. శుక్రవారం స్వర్ణరథోత్సవం, రాత్రి గరుడవాహన సేవ వైభవంగా నిర్వహించనున్నారు. వైష్ణవ సంప్రదాయంలో గరుడసేవకు ప్రత్యేక ప్రాముఖ్యత ఉండగా, ఈ ఉత్సవాలు భక్తులకు ఆధ్యాత్మిక ఆనందాన్ని పంచుతున్నాయి.