‘శ్రీనివాస మంగాపురం’ మూవీ రివ్యూ!

D Entr: Jul 30: ‘శ్రీనివాస మంగాపురం’ మూవీ రివ్యూ: సూపర్ స్టార్ కృష్ణ మనవడు జై కృష్ణ ఘట్టమనేని హీరోగా, ‘ఆర్‌ఎక్స్ 100’ దర్శకుడు అజయ్ భూపతి తెరకెక్కించిన చిత్రం శ్రీనివాస మంగాపురం. ప్రముఖ నిర్మాణ సంస్థ వైజయంతి మూవీస్ భాగస్వామ్యంతో రూపొందిన ఈ చిత్రంలో అనిల్ తడాని, రవీనా టాండన్ కుమార్తె రాశా తడాని హీరోయిన్‌గా పరిచయమైంది. అనౌన్స్‌మెంట్‌ నుంచే మంచి అంచనాలు నెలకొన్న ఈ చిత్రం ప్రమోషనల్ కంటెంట్‌తో ప్రేక్షకుల్లో ఆసక్తిని పెంచింది.

కథ: తిరుపతిలో పెద్దమనిషిగా పేరొందిన పెద్దిరెడ్డి (కిక్ శ్యామ్) తన కుటుంబం కోసం ఎంతటి సాహసానికైనా వెనుకాడని వ్యక్తి. అతని కుమార్తె మంగ (రాశా తడాని)ను ప్రేమించిన శ్రీను (జై కృష్ణ) ఆమె మనసు గెలుచుకోవడానికి ప్రయత్నాలు చేస్తుంటాడు. ఈ క్రమంలో పెద్దిరెడ్డి తమ్ముడు సుబ్బారెడ్డి (శ్రీ తేజ్) చేతికి చిక్కిన శ్రీను, అనుకోకుండా జరిగిన గ్యాంగ్ దాడిలో సుబ్బారెడ్డి ప్రాణాలను కాపాడతాడు. దీంతో పెద్దిరెడ్డి అతడిని తన ఇంటికి పిలిపిస్తాడు.

అసలు శ్రీను ఎవరు? మంగను ఎందుకు ప్రేమిస్తున్నాడు? బళ్లారి వెంకటప్పయ్య నాయుడు (మోహన్ బాబు) పాత్ర ఏమిటి? ఈ ప్రశ్నలకు సమాధానాలు తెలుసుకోవాలంటే సినిమా చూడాల్సిందే.

విశ్లేషణ: కథ పరంగా చూస్తే ఇది పూర్తిగా కొత్తదనం ఉన్న సినిమా కాదు. గతంలో ఎన్నోసార్లు చూసిన ప్రేమకథకు రివెంజ్ డ్రామాను జోడించి దర్శకుడు అజయ్ భూపతి కమర్షియల్ ఎంటర్‌టైనర్‌గా తీర్చిదిద్దే ప్రయత్నం చేశాడు. హీరో పరిచయాన్ని దృష్టిలో పెట్టుకుని యాక్షన్, రొమాన్స్, భావోద్వేగాలకు సమాన ప్రాధాన్యం ఇచ్చాడు.

ఫస్ట్ హాఫ్‌లో హీరో గాయపడే సన్నివేశం, హీరో-హీరోయిన్ మధ్య ప్రేమకథ, పెద్దిరెడ్డి పాత్ర చుట్టూ సృష్టించిన సస్పెన్స్ ప్రేక్షకుల్లో ఆసక్తిని పెంచుతాయి. సెకండ్ హాఫ్‌లో అసలు కథను దర్శకుడు స్క్రీన్‌ప్లేతో ముందుకు నడిపించినా, కథాంశం రొటీన్‌గా అనిపించే సందర్భాలు ఉన్నాయి. ముఖ్యంగా క్లైమాక్స్‌ను మరింత బలంగా తీర్చిదిద్దితే సినిమా ప్రభావం ఇంకాస్త పెరిగేదనే భావన కలుగుతుంది.

నటీనటుల ప్రదర్శన: జై కృష్ణ ఘట్టమనేనికి ఇది మంచి లాంచింగ్ మూవీగా చెప్పొచ్చు. డాన్స్, యాక్షన్, భావోద్వేగ సన్నివేశాల్లో తన సామర్థ్యాన్ని చక్కగా ప్రదర్శించాడు. రాశా తడాని తన తొలి చిత్రంలోనే అందంతో పాటు నటనతో కూడా ఆకట్టుకుంది.

మోహన్ బాబు తన అనుభవంతో పాత్రకు బలం చేకూర్చారు. కిక్ శ్యామ్, శ్రీ తేజ్, వాసుకి, అజయ్, కిల్లి క్రాంతి, వడ్లమాని శ్రీనివాస్, బ్రహ్మాజీ తమ పాత్రల పరిధిలో మెప్పించారు. నరేష్ కామెడీ సన్నివేశాలు వినోదాన్ని పంచి ప్రేక్షకులను అలరించాయి.