DSports 20Feb 2026:కాన్పూర్/ఉన్నావ్: క్రికెట్ మైదానంలో అరుదైన, అత్యంత విషాదకర ఘటన చోటుచేసుకుంది. సాధారణంగా వర్షం వల్లనో, వెలుతురు లేకపోవడం వల్లనో మ్యాచ్లు ఆగిపోవడం చూస్తుంటాం. కానీ, ఉత్తరప్రదేశ్లో తేనెటీగల దాడి ఒక ప్రాణాన్ని బలితీసుకుంది. కాన్పూర్ క్రికెట్ అసోసియేషన్ (KCA) ఆధ్వర్యంలో జరుగుతున్న అండర్-13 లీగ్ మ్యాచ్లో ఈ ఘోరం జరిగింది.
- ఉన్నావ్ జిల్లాలోని శుక్లాగంజ్ సప్రూ మైదానంలో వైఎంసీసీ (YMCC), పారామౌంట్ జట్ల మధ్య బుధవారం సాయంత్రం మ్యాచ్ జరుగుతోంది. ఆటగాళ్లు డ్రింక్స్ బ్రేక్ సమయంలో నీరు తాగుతుండగా, ఒక్కసారిగా ఎక్కడి నుంచి వచ్చిందో కానీ ఒక పెద్ద తేనెటీగల గుంపు మైదానంలోకి దూసుకొచ్చింది. మైదానంలో ఉన్న ఆటగాళ్లు, అంపైర్లు, అధికారులు ప్రాణభయంతో పరుగులు తీశారు.
- ఈ దాడిలో కాన్పూర్ క్రికెట్ అసోసియేషన్కు చెందిన 65 ఏళ్ల సీనియర్ అంపైర్ మాణిక్ గుప్తా తీవ్రంగా గాయపడ్డారు. చిన్నపిల్లలైన ఆటగాళ్లు వేగంగా పరుగెత్తి తప్పించుకోగలిగారు కానీ, వయసు పైబడటం వల్ల మాణిక్ గుప్తా త్వరగా పరుగెత్తలేకపోయారు. వందలాది తేనెటీగలు ఆయన ముఖం, శరీరంపై ఒకేసారి దాడి చేశాయి.
- తేనెటీగల విషం శరీరం అంతటా పాకడంతో ఆయన అపస్మారక స్థితికి చేరుకున్నారు.వెంటనే ఆయనను స్థానిక ప్రైవేట్ ఆసుపత్రికి, ఆపై కాన్పూర్లోని ఎల్ఎల్ఆర్ ఆసుపత్రికి తరలించారు. అయితే, అప్పటికే ఆయన మరణించినట్లు వైద్యులు ధృవీకరించారు. మాణిక్ గుప్తా శరీరం అనాఫిలాక్టిక్ షాక్’ (తీవ్రమైన అలర్జీ ప్రతిచర్య) కు గురై మరణించినట్లు తెలుస్తోంది.