D-News: కిర్గిజిస్థాన్ రాజధాని బిష్కెక్లో జరుగుతున్న షాంఘై సహకార సంస్థ (SCO) సదస్సు సందర్భంగా ప్రధాని నరేంద్ర మోదీ అర్మేనియా ప్రధాని నికోల్ పషిన్యాన్తో ద్వైపాక్షిక సమావేశం నిర్వహించారు. ఇరు దేశాల మధ్య సంబంధాలను మరింత బలోపేతం చేయడం, వివిధ రంగాల్లో సహకారాన్ని పెంచుకోవడంపై ఇరువురు నేతలు చర్చించారు.
భారత్, అర్మేనియాల మధ్య స్నేహపూర్వక సంబంధాలు చారిత్రకంగా కొనసాగుతున్నాయి. గత కొన్నేళ్లుగా ముఖ్యంగా రక్షణ రంగంలో ఇరు దేశాల భాగస్వామ్యం మరింత విస్తరించింది. భారత్ నుంచి అర్మేనియా పలు అధునాతన రక్షణ వ్యవస్థలను కొనుగోలు చేస్తోంది.
భారత్ తయారు చేసిన స్వాతి వెపన్-లోకేటింగ్ రాడార్, ATAGS ఆర్టిలరీ గన్, పినాక రాకెట్ వ్యవస్థ, ఆకాష్ ఎయిర్ డిఫెన్స్ సిస్టమ్, డ్రోన్లు, యాంటీ-డ్రోన్ వ్యవస్థలు సహా పలు రక్షణ పరికరాలు అర్మేనియా రక్షణ సామర్థ్యాన్ని పెంచడంలో కీలకంగా మారాయి.
పశ్చిమాసియా పరిణామాలపై సహకారం
ఇటీవల అర్మేనియా పార్లమెంటరీ ఎన్నికల్లో పషిన్యాన్, ఆయన పార్టీ విజయం సాధించిన సందర్భంగా ప్రధాని మోదీ అభినందనలు తెలిపారు. పశ్చిమాసియాలో ఉద్రిక్తతల సమయంలో ఇరాన్లో చిక్కుకున్న భారతీయులను తరలించేందుకు అర్మేనియా అందించిన సహకారానికి కూడా మోదీ కృతజ్ఞతలు తెలిపారు.
బిష్కెక్ పర్యటనలో భాగంగా మోదీ పలు దేశాల నేతలతో సమావేశం కానున్నారు. ఇరాన్ అధ్యక్షుడు మసూద్ పెజెష్కియాన్, రష్యా అధ్యక్షుడు వ్లాదిమిర్ పుతిన్తో కూడా ద్వైపాక్షిక చర్చలు జరగనున్నాయి.
ఎస్సీఓ సదస్సులో సభ్య దేశాల మధ్య సహకారం, ప్రాంతీయ భద్రత, అంతర్జాతీయ పరిణామాలు వంటి అంశాలు ప్రధానంగా చర్చకు రానున్నాయి. ఈ నేపథ్యంలో మోదీ–పషిన్యాన్ భేటీ భారత్–అర్మేనియా వ్యూహాత్మక సంబంధాలకు మరింత ప్రాధాన్యం తీసుకొచ్చింది.