ప్రస్తుతం చాలా మంది ఆరోగ్యకరమైన, పోషకాలు సమృద్ధిగా ఉండే ఆహారాన్ని తీసుకోవడానికి ఆసక్తి చూపిస్తున్నారు. ఇందులో భాగంగా సాధారణ బియ్యం ఇడ్లీలకు బదులుగా మిల్లెట్ ఇడ్లీలను తమ ఆహారంలో చేర్చుకుంటున్నారు. అయితే వీటిని తయారు చేసేటప్పుడు కొన్నిసార్లు ఇడ్లీలు గట్టిగా, పొడిగా మారుతుంటాయి. మెత్తగా, స్పాంజిలా రావు. మరి మిల్లెట్ ఇడ్లీలు కూడా సాధారణ ఇడ్లీల మాదిరిగా మెత్తగా, రుచిగా రావాలంటే ఎలాంటి జాగ్రత్తలు తీసుకోవాలి? పిండిని ఎలా సిద్ధం చేసుకోవాలి? ఇప్పుడు తెలుసుకుందాం.
మిల్లెట్ ఇడ్లీలను ఆరోగ్యకరమైన అల్పాహారంగా చాలామంది తమ రోజువారీ ఆహారంలో భాగం చేసుకుంటున్నారు. రాగితో పాటు సజ్జలు, కొర్రలు, జొన్నలు వంటి వివిధ రకాల చిరుధాన్యాలను కలిపి ఇడ్లీలు తయారు చేస్తున్నారు. అయితే వీటితో ఇడ్లీలు చేసేటప్పుడు కొన్నిసార్లు గట్టిగా, మెత్తదనం లేకుండా వస్తుంటాయి. అలా కాకుండా ఇడ్లీలు దూదిలా మెత్తగా రావాలంటే కొన్ని ముఖ్యమైన చిట్కాలు పాటించాలి. ముఖ్యంగా చిరుధాన్యాలను సరైన మోతాదులో తీసుకోవడంతో పాటు నానబెట్టడం, రుబ్బడం, పులియబెట్టడం వంటి ప్రతి దశలో తగిన జాగ్రత్తలు తీసుకోవాలి.
చిరుధాన్యాలను సరైన సమయం పాటు నానబెట్టడం వల్ల అవి మెత్తగా మారి రుబ్బేటప్పుడు సులభంగా గ్రైండ్ అవుతాయి. దీంతో ఇడ్లీలకు మంచి మెత్తదనం వస్తుంది. అలాగే పిండిని రుబ్బిన తర్వాత తగినంత సమయం పులియబెట్టడం కూడా చాలా ముఖ్యం. సాధారణంగా వాతావరణాన్ని బట్టి సుమారు 8 గంటల పాటు పులియబెట్టవచ్చు. ఇలా చేయడం వల్ల ఇడ్లీలు మెత్తగా రావడంతో పాటు రుచిగా కూడా ఉంటాయి.
ఇక ఇడ్లీలను ఉడికించే విధానం కూడా వాటి మెత్తదనంపై ప్రభావం చూపుతుంది. ముందుగా కుక్కర్ లేదా ఇడ్లీ పాత్రలో నీటిని పోసి వేడి చేయాలి. నీరు బాగా వేడెక్కిన తర్వాత ఇడ్లీ ప్లేట్లను పెట్టి మూత పెట్టాలి. ఆవిరిపై ఇడ్లీలు సరిగ్గా ఉడికేలా చూసుకోవాలి. మరీ ఎక్కువ మంటపై ఉడికించకుండా, మంటను తగ్గించి సుమారు 10 నుంచి 15 నిమిషాల పాటు ఉడికిస్తే మిల్లెట్ ఇడ్లీలు మెత్తగా వచ్చే అవకాశం ఉంటుంది. అయితే ఉడికించే సమయం ఇడ్లీల పరిమాణం, పిండి గాఢతను బట్టి మారవచ్చు.
ఇలా సరైన మోతాదులు, నానబెట్టే సమయం, పులియబెట్టడం, ఆవిరిపై ఉడికించడం వంటి చిన్న చిన్న చిట్కాలు పాటిస్తే ఇంట్లోనే రుచికరమైన, మెత్తటి మిల్లెట్ ఇడ్లీలను తయారు చేసుకోవచ్చు. చిరుధాన్యాలు ఫైబర్, ఇతర పోషకాలను అందించినప్పటికీ, వాటిని సమతుల్య ఆహారంలో భాగంగా తీసుకోవడం మంచిది.