D Spiritual: Feb 12: శివరాత్రి సమీపిస్తున్న నేపథ్యంలో అనేక మంది భక్తులు శివాలయాలను సందర్శించేందుకు సిద్ధమవుతున్నారు. సాధారణంగా ఎక్కడైనా శివలింగం ఉన్నచోట ఆలయం లేదా చిన్న పందిరి అయినా ఉంటుంది. అయితే ఎలాంటి గుడి, పైకప్పు లేకుండానే వానకు తడుస్తూ, ఎండకు ఎండుతూ భక్తుల కోరికలు తీర్చుతున్న పరమశివుడు ఒక చోట వెలసి ఉన్నాడు. పచ్చటి అటవీ మధ్య భక్తులచే స్వయంగా పూజలు అందుకుంటూ మహిమను చాటుతున్న ఈ క్షేత్రం భక్తుల్ని విశేషంగా ఆకర్షిస్తోంది.
పశ్చిమ గోదావరి జిల్లా మొగల్తూరు ప్రాంతంలోని అటవీ విస్తారంలో స్వయంభూ లంకేశ్వరుడిగా పరమేశ్వరుడు వెలిశారని స్థానికులు చెబుతున్నారు. వనాల మధ్య కొలువుదీరిన ఈ స్వామివారిని అక్కడి ప్రజలు ప్రేమగా “వన మల్లిఖార్జునుడు” అని పిలుస్తారు. ప్రకృతి మధ్యలో స్వయంభువుగా వెలసిన ఈ శివలింగం భక్తుల విశ్వాసానికి ప్రతీకగా నిలిచింది.
ఇక్కడ ప్రతిరోజూ పూజలు జరుగుతుంటాయి. ముఖ్యంగా భక్తులు స్వయంగా శివలింగాన్ని తాకి పూజలు, అభిషేకాలు చేసే అవకాశం ఉండటంతో మొగల్తూరు ప్రాంత ప్రజలతో పాటు పరిసర ప్రాంతాల నుంచి కూడా అనేక మంది భక్తులు తరలివస్తుంటారు. ఈ విధంగా స్వయంభూలింగేశ్వర వన మల్లిఖార్జునుడిగా ఈ క్షేత్రం ప్రసిద్ధి చెందింది. శ్రీశైలం తర్వాత భక్తులు నేరుగా శివలింగాన్ని ముట్టుకుని పూజించే అవకాశం ఉన్న ప్రదేశంగా దీనిని విశేషంగా భావిస్తారు. గతంలో శివలింగంపై పందిరి ఏర్పాటు చేయగా అది అగ్నికి ఆహుతి కావడంతో, స్వామివారి సంకల్పమేనని భావించి ఇకపై ఆలయం నిర్మించే ప్రయత్నాలు మానుకున్నారని స్థానికులు చెబుతున్నారు.
పూర్వం ఈ ప్రాంతం ఘనమైన అటవీ ప్రాంతంగా ఉండేదని చెబుతారు. ఆ సమయంలో ఇక్కడికి వచ్చిన సన్యాసులు సమీపంలోని కోనేరులో నుంచి నీరు తెచ్చి స్వామివారికి అభిషేకాలు నిర్వహించేవారట. మొగల్తూరు రాజులు కూడా అడవిలోకి వచ్చి ఈ స్వామివారిని దర్శించుకుని పూజలు చేసేవారని కథనం. కొంతకాలం తరువాత కొందరు రాజులు అడవిలోకి రావడం ఇబ్బందిగా భావించి శివలింగాన్ని కోట సమీపంలో ప్రతిష్ఠించేందుకు ప్రయత్నించినప్పటికీ, అనేక కారణాల వల్ల అది సాధ్యపడలేదని స్థానిక పురాణాలు చెబుతున్నాయి.