దీపావళి పండుగ ప్రభావంతో హైదరాబాద్‌ నగరంలో బస్సుల రాకపోకలు తగ్గాయి. నగరంలో తిరిగే ఆర్టీసీ బస్సుల్లో చాలా వరకు జిల్లాలకు కేటాయించడంతో శుక్రవారం సిటీ బస్సుల సంఖ్య గణనీయంగా తగ్గింది. దీంతో బస్సుల కోసం ఎదురుచూస్తున్న ప్రయాణికులు తీవ్ర ఇబ్బందులు ఎదుర్కొన్నారు.
సిటీబ్యూరో, నవంబర్‌ 6: దీపావళి పండుగ నేపథ్యంలో సొంతూళ్లకు వెళ్లే ప్రయాణికుల రద్దీని దృష్టిలో ఉంచుకుని ఆర్టీసీ అధికారులు నగర బస్సుల్లో అధిక సంఖ్యలో సర్వీసులను జిల్లాలకు మళ్లించారు. దీంతో హైదరాబాద్‌లో సాధారణంగా అందుబాటులో ఉండే బస్సుల సంఖ్య తగ్గిపోయింది. మరోవైపు బస్సులు నిర్ణీత సమయానికి రాకపోవడంతో ప్రయాణికులు బస్టాపుల్లో గంటల తరబడి నిరీక్షించాల్సిన పరిస్థితి ఏర్పడింది.
బస్సుల రాకపోకలకు సంబంధించిన సమాచారం అందించే గమ్యం యాప్‌లోనూ సరైన వివరాలు అప్‌డేట్‌ కావడం లేదు. దీంతో ఏ బస్సు ఎప్పుడు వస్తుందో తెలియక ప్రయాణికులు అయోమయానికి గురవుతున్నారు. బస్‌ షెల్టర్ల వద్ద కూడా సర్వీసుల సమయాల గురించి సమాచారం అందించే సిబ్బంది లేకపోవడంతో ఇబ్బందులు మరింత పెరుగుతున్నాయి.
కొన్ని ప్రాంతాల్లో బస్సుల కోసం అరగంట వరకు వేచి చూడాల్సి వస్తోంది. దీంతో తప్పనిసరి పరిస్థితుల్లో పలువురు ప్రయాణికులు ఆన్‌లైన్‌ ఆధారిత క్యాబ్‌లు, ఇతర ప్రైవేట్‌ వాహన సేవలను ఆశ్రయిస్తున్నారు. బస్సు పాస్‌లు ఉన్నప్పటికీ అదనంగా డబ్బులు ఖర్చు చేయాల్సి వస్తోందని ఆవేదన వ్యక్తం చేస్తున్నారు.
మరోవైపు రాత్రి వేళల్లో కొన్ని బస్సు సర్వీసులు రద్దవుతున్నాయి. అయితే ఈ విషయం ముందుగా తెలియజేయకపోవడంతో ప్రయాణికులు బస్టాపులకు వచ్చాక ఇబ్బందులు పడుతున్నారు. బస్సుల రాకపోకలు, సర్వీసుల రద్దు వివరాలను ఎప్పటికప్పుడు యాప్‌లో అప్‌డేట్‌ చేయడంతో పాటు ప్రయాణికులకు ముందస్తు సమాచారం అందించేలా ఆర్టీసీ అధికారులు చర్యలు తీసుకోవాలని నగరవాసులు కోరుతున్నారు.