D Spiritual: Dec 15: ద్వారకా తిరుమల చిన్న వెంకన్న ఆలయ పాలక మండలి మరో కీలక నిర్ణయం తీసుకుంది. ధనుర్మాసం సందర్భంగా ఈ నెల 16వ తేదీ నుంచి వచ్చే నెల 14వ తేదీ వరకు ఆలయంలో సుప్రభాత సేవను రద్దు చేస్తున్నట్లు ప్రకటించింది.
ద్వారకా తిరుమల చిన్న వెంకన్న ఆలయంలో ధనుర్మాసోత్సవాల నేపథ్యంలో సుప్రభాత సేవకు బదులుగా తిరుప్పావై సేవను నిర్వహించనున్నట్లు ఆలయ పాలక మండలి తెలిపింది.
అలాగే ఈ నెల 29వ తేదీన స్వామివారి పాదుకా మండపం నుంచి శేషాచలం కొండ చుట్టూ గిరి ప్రదక్షణ నిర్వహించనున్నట్లు వెల్లడించింది. ఈ కార్యక్రమంలో భక్తులు పెద్ద సంఖ్యలో పాల్గొననున్నారని పేర్కొంది.
ముక్కోటి ఏకాదశి సందర్భంగా ఈ నెల 30వ తేదీన స్వామివారి ఉత్తర ద్వార దర్శనం నిర్వహించనున్నట్లు ఆలయ అధికారులు తెలిపారు. ఈ దర్శనానికి భక్తులు అధిక సంఖ్యలో తరలివచ్చే అవకాశం ఉందని అన్నారు.
ఇక ఈ నెల 30వ తేదీ నుంచి వచ్చే నెల 9వ తేదీ వరకు ఆలయంలో అధ్యయనోత్సవాలను నిర్వహించనున్నట్లు తెలిపారు. ఈ సందర్భంగా ప్రతిరోజూ సాయంకాలం జరిగే స్వామివారి ఆర్జిత సేవలను రద్దు చేస్తున్నట్లు ఆలయ పాలక మండలి స్పష్టం చేసింది.
ఈ మార్పులను భక్తులు గమనించి సహకరించాలని ద్వారకా తిరుమల చిన్న వెంకన్న ఆలయ పాలక మండలి విజ్ఞప్తి చేసింది.