D Spiritual: Dec 11: తాంబూలం అంటే తమలపాకులు, వక్కలు, సున్నం మరియు కొన్ని సుగంధ ద్రవ్యాల సమ్మేళనం. శరీరానికి జీర్ణశక్తిని, రోగనిరోధక శక్తిని పెంచేందుకు వేర్వేరు నిష్పత్తుల్లో వివిధ రకాల తాంబూలాలను కడతారు. సాధారణంగా తాంబూలం తమలపాకులతోనే చేస్తారు. అయితే, కొన్ని ప్రత్యేక సందర్భాల్లో మామిడి ఆకులు, మారేడు ఆకులతో ఇచ్చే తాంబూలాలు కూడా పరంపరలో ఉన్నాయి.
ప్రాచీన కాలంలో కవులను గ్రంథరచనకు ప్రోత్సహించేందుకు రాజులు కర్పూర తాంబూలాలు, బంగారు తాంబూలాలు అందించేవారని ప్రబంధాలు పేర్కొంటున్నాయి. ఆరోగ్యాన్ని రక్షించే ఉద్దేశ్యంతో జాజికాయ, జాపత్రి, పచ్చకర్పూరం, కస్తూరి వంటి సుగంధ ద్రవ్యాలను తాంబూలంలో ఉపయోగించే అలవాటు కూడా ఉంది.
పెండ్లి, గృహప్రవేశం వంటి శుభకార్యాలలో విందుభోజనం అనంతరం తాంబూలం ఇవ్వడం ఒక సంప్రదాయ పరిపాటి. వివాహ నిర్ణయ సందర్భాన్ని ‘నిశ్చయ తాంబూలాలు’ అని పిలవడం కూడా ఈ తాంబూలానికి ఉన్న ప్రాముఖ్యతను స్పష్టంగా తెలియజేస్తుంది. షోడశోపచార పూజా విధానంలో దైవానికి తాంబూలం సమర్పించడం మరొక శాస్త్రీయ ఆచారం. అంతేకాక, పెద్దలను లేదా గురువులను కలిసే సమయంలో కూడా శ్రద్ధార్థంగా తాంబూలం అందిస్తారు.
అయితే ప్రమాదాల పాలైన వారిని సందర్శించే సందర్భాల్లో తాంబూలం ఇవ్వడం సంప్రదాయ నిషేధంగా భావిస్తారు. అలాగే, అనారోగ్యకరమైన ఉత్ప్రేరకాలు కలిపి తాంబూలం సేవించడం ఆరోగ్యానికి హానికరం అవుతుంది కాబట్టి దానిని నివారించడం మంచిది.