ఖైరతాబాద్ గణేష్ శోభాయాత్ర ప్రారంభం

D Spiritual: Sept 25: ఖైరతాబాద్ గణేష్ శోభాయాత్ర వైభవంగా ప్రారంభం

ప్రసిద్ధ ఖైరతాబాద్ గణేష్ శోభాయాత్ర 2026 వైభవంగా ప్రారంభమైంది. బాహుబలి క్రేన్‌లో తలెత్తిన సాంకేతిక సమస్య కారణంగా ఉదయం 6 గంటలకు ప్రారంభం కావాల్సిన శోభాయాత్ర మూడు గంటల ఆలస్యంగా ఉదయం 9 గంటలకు ప్రారంభమైంది. ఆలస్యం జరిగినప్పటికీ భారీ సంఖ్యలో భక్తులు తరలివచ్చి గణనాథుడిని దర్శించుకుంటున్నారు. శోభాయాత్ర ఆలస్యం కావడంతో పరిసర ప్రాంతాల్లో భక్తుల రద్దీ క్రమంగా పెరుగుతోంది.

హైదరాబాద్ సీపీ సజ్జనార్ స్వయంగా ఖైరతాబాద్ మహాగణపతిని దర్శించుకుని శోభాయాత్రకు సంబంధించిన ఏర్పాట్లను పరిశీలించారు. యాత్ర ప్రశాంతంగా జరిగేలా అన్ని రకాల భద్రతా చర్యలు చేపట్టినట్లు ఆయన తెలిపారు. ప్రజలంతా ఎలాంటి అవాంఛనీయ సంఘటనలకు తావులేకుండా శాంతియుత వాతావరణంలో పండుగను జరుపుకోవాలని సీపీ సూచించారు. సోషల్ మీడియాలో విద్వేషాలను రెచ్చగొట్టేలా పోస్టులు పెట్టే వారిపై కఠిన చర్యలు తీసుకుంటామని ఆయన హెచ్చరించారు.

ఎన్టీఆర్ మార్గ్ వైపుగా శోభాయాత్ర

69 అడుగుల ఎత్తైన ఖైరతాబాద్ మహాగణపతి నిమజ్జనం కోసం ఎన్టీఆర్ మార్గ్ వద్ద ప్రత్యేక ఏర్పాట్లు చేశారు. శోభాయాత్ర సెన్సేషన్ థియేటర్, రాజ్‌దూత్ చౌరస్తా, టెలిఫోన్ భవన్, ఇక్బాల్ మినార్, తెలంగాణతల్లి చౌరస్తా మీదుగా కొనసాగనుంది. మధ్యాహ్నం 2 గంటల కల్లా క్రేన్ నంబర్ 5 వద్ద నిమజ్జన కార్యక్రమాన్ని పూర్తి చేయాలని అధికారులు లక్ష్యంగా పెట్టుకున్నారు.

భారీ టస్కర్ ట్రక్కును నడిపేందుకు అనుభవజ్ఞుడైన డ్రైవర్ మందడి వెంకటరెడ్డి నాలుగోసారి రథసారథిగా వ్యవహరిస్తున్నారు. విజయవాడ ఎస్టీసీ ట్రాన్స్‌పోర్ట్‌లో సుదీర్ఘ అనుభవం ఉన్న ఆయన లక్షలాది మంది భక్తుల మధ్య ఎంతో నైపుణ్యంతో వాహనాన్ని ముందుకు నడుపుతున్నారు.

హైకోర్టు ఆదేశాల మేరకు కేటాయించిన జలాశయాల్లోనే గణేష్ విగ్రహాల నిమజ్జనం నిర్వహించాలని పోలీసులు స్పష్టం చేశారు. హైదరాబాద్ గంగా-జమునా తెహజీబ్ సంస్కృతిని కాపాడేలా ప్రతి ఒక్కరూ సహకరించాలని అధికారులు కోరారు.

గణేష్ నిమజ్జనం నేపథ్యంలో ట్రాఫిక్ ఆంక్షలు

గణేష్ నిమజ్జనం సందర్భంగా హైదరాబాద్‌లో ట్రాఫిక్ ఆంక్షలు కొనసాగనున్నాయి. ప్రధాన నిమజ్జన మార్గాల్లో కేవలం గణేష్ విగ్రహాలను తరలించే వాహనాలకు మాత్రమే అనుమతి ఇవ్వనున్నారు. సాధారణ వాహనాల రాకపోకలపై ఆంక్షలు ఉండటంతో ప్రయాణికులు ప్రత్యామ్నాయ మార్గాలను ఎంచుకోవాలని ట్రాఫిక్ పోలీసులు సూచించారు.

బషీర్‌బాగ్ జంక్షన్ వద్ద ప్రత్యేకంగా క్రాసింగ్‌కు అధికారులు అవకాశం కల్పించారు. వాహనదారులు ఇన్నర్ రింగ్ రోడ్డు లేదా ఆర్‌ఆర్‌ఆర్ మార్గాలను వినియోగించుకోవాలని సూచించారు. ట్రాఫిక్ నిబంధనలకు సంబంధించి సహాయం అవసరమైతే పోలీసుల ప్రత్యేక హెల్ప్‌లైన్ నంబర్లను సంప్రదించవచ్చని అధికారులు తెలిపారు.

నిమజ్జన వాహనాలకు అనుభవజ్ఞులైన డ్రైవర్లను మాత్రమే నియమించాలని, శోభాయాత్రకు ముందుగానే రూట్ సర్వే నిర్వహించుకోవాలని నిర్వాహకులకు పోలీసులు సూచించారు. నిమజ్జన కార్యక్రమం సజావుగా, ప్రశాంతంగా జరిగేందుకు భక్తులు, వాహనదారులు పోలీసులకు సహకరించాలని అధికారులు కోరారు.