అమెరికాలోని మియామీ అంతర్జాతీయ విమానాశ్రయంలో ఘోర విమాన ప్రమాదం చోటుచేసుకుంది. అమెజాన్‌కు చెందిన కార్గో జెట్ ల్యాండింగ్ సమయంలో అదుపుతప్పి రన్‌వే దాటి వాహనాలపైకి దూసుకెళ్లింది. అనంతరం విమానంలో భారీగా మంటలు చెలరేగడంతో ఈ ప్రమాదం విషాదాన్ని మిగిల్చింది.
ఈ ఘటనలో ఐదుగురు ప్రాణాలు కోల్పోగా, మరో ఐదుగురు గాయపడినట్లు సమాచారం. ప్రమాదం జరిగిన సమయంలో విమానం మంటల్లో చిక్కుకోగా, పైలట్ కాక్‌పిట్ తలుపు నుంచి కిందకు దూకి ప్రాణాలను కాపాడుకున్న దృశ్యాలు ప్రస్తుతం సోషల్ మీడియా, ప్రసార మాధ్యమాల్లో వైరల్‌గా మారాయి.
అసలు ప్రమాదం ఎలా జరిగింది? విమానం ఎందుకు అదుపుతప్పింది? ఈ ఘటనకు సంబంధించిన పూర్తి వివరాలు ఇప్పుడు తెలుసుకుందాం.
అమెరికాలోని ఫ్లోరిడా రాష్ట్రంలోని మియామీ అంతర్జాతీయ విమానాశ్రయంలో తీవ్ర విషాదకర ఘటన చోటుచేసుకుంది. అమెజాన్‌కు చెందిన ప్రైమ్ ఎయిర్ కార్గో జెట్ ల్యాండింగ్ సమయంలో అదుపుతప్పి రన్‌వే దాటి పక్కనే ఉన్న వాహనాలపైకి దూసుకెళ్లింది. ఈ ప్రమాదంతో అక్కడ భారీ కలకలం నెలకొంది.
బోయింగ్ 767 రకానికి చెందిన 7598 విమానం ప్యూర్టో రికో నుంచి మియామీకి బయలుదేరింది. విమానం మియామీ అంతర్జాతీయ విమానాశ్రయంలో ల్యాండ్ అవుతున్న సమయంలో ఈ ప్రమాదం జరిగినట్లు సమాచారం.
మధ్యాహ్నం సుమారు 2 గంటల సమయంలో ఈ ప్రమాదం జరిగినట్లు తెలుస్తోంది. రన్‌వేపై వేగాన్ని అదుపు చేయలేకపోయిన విమానం అదుపుతప్పి అక్కడ నిలిపి ఉన్న పలు వాహనాలను బలంగా ఢీకొట్టింది. ఢీకొన్న వెంటనే భారీగా మంటలు చెలరేగడంతో విమానాశ్రయంలో తీవ్ర భయాందోళనలు నెలకొన్నాయి.
ఈ ఘటనలో ఐదుగురు అక్కడికక్కడే మృతి చెందినట్లు సమాచారం. ప్రమాదం జరిగిన సమయంలో ఓ పైలెట్ వెంటనే విమానం కాక్‌పిట్ నుంచి బయటకు దూకి ప్రాణాలను కాపాడుకున్నాడు. ప్రస్తుతం ఈ భయానక ఘటనకు సంబంధించిన వీడియో సోషల్ మీడియాలో వైరల్‌గా మారింది.
విమానం మంటల్లో చిక్కుకుని కాలిపోతున్న సమయంలో పైలట్ ప్రదర్శించిన అసాధారణ ధైర్యం అందరినీ ఆశ్చర్యానికి గురిచేసింది. కాక్‌పిట్ తలుపును బద్దలు కొట్టుకుని బయటకు వచ్చిన పైలట్.. అగ్నికీలల మధ్య నుంచి కిందకు దూకి ప్రాణాలతో బయటపడ్డాడు. అనంతరం కుంటుకుంటూనే వేగంగా సురక్షిత ప్రాంతం వైపు పరుగెత్తిన దృశ్యాలు కెమెరాలో రికార్డయ్యాయి.
ఈ భయానక దృశ్యాలను ఎన్‌బీసీ మియామీ ఛానెల్ ప్రసారం చేయడంతో అవి సామాజిక మాధ్యమాల్లో వైరల్‌గా మారాయి. ప్రమాద సమయంలో నాలుగు నెలల చిన్నారితో కలిసి ప్రయాణిస్తున్న ఒల్విన్ హెన్రిక్వెజ్.. ఈ ఘటనను ప్రత్యక్షంగా చూశారు. కళ్లముందే చోటుచేసుకున్న ఈ భయానక ప్రమాదం తనను తీవ్ర దిగ్భ్రాంతికి గురిచేసిందని ఆయన తన అనుభవాన్ని పంచుకున్నారు.