D-News: భారత్‌ ఆర్థిక వ్యవస్థలో 8 శాతం వృద్ధి సాధించాలంటే పెట్టుబడి రేటును GDPలో 34–35 శాతానికి పెంచాల్సిన అవసరం ఉందని మాజీ EAC-PM సభ్యుడు సుర్జిత్‌ భల్లా అన్నారు. ముఖ్యంగా దీర్ఘకాలిక వృద్ధి, ఉత్పాదకత పెంపునకు ప్రైవేట్‌ రంగ పెట్టుబడులు కీలకమని ఆయన పేర్కొన్నారు.
ముంబైలో జరిగిన ‘ఎలారా ఇండియా డైలాగ్‌ 2026’ కార్యక్రమంలో మాట్లాడిన భల్లా.. ప్రస్తుతం భారత్‌ పెట్టుబడి-GDP నిష్పత్తి 28–30 శాతం మధ్య ఉందని తెలిపారు. ఈ స్థాయి సుమారు 6.5 శాతం దీర్ఘకాలిక వృద్ధికి సరిపోతుందని, 8 శాతం వృద్ధి లక్ష్యానికి మరింత పెట్టుబడి అవసరమని వివరించారు.
ప్రైవేట్‌ పెట్టుబడులు పెరగాలి
ప్రభుత్వ పెట్టుబడులు మౌలిక వసతుల అభివృద్ధికి ఉపయోగపడుతూ తక్షణ ఆర్థిక కార్యకలాపాలను పెంచుతాయని భల్లా అన్నారు. అయితే ఉత్పాదకత, దీర్ఘకాలిక ఆర్థిక విస్తరణ కోసం ప్రైవేట్‌ పెట్టుబడులు మరింత ముఖ్యమని చెప్పారు.
2011–12 నుంచి భారత్‌లో ప్రైవేట్‌ పెట్టుబడుల స్థాయి 5–7 శాతం పాయింట్లు తగ్గిందని ఆయన పేర్కొన్నారు. ఈ లోటును భర్తీ చేయడం ద్వారా పెట్టుబడి రేటును పెంచాల్సిన అవసరం ఉందన్నారు.
ప్రపంచ వాణిజ్యంపై ఆధారపడలేం
ప్రపంచ వాణిజ్య పరిస్థితులు భారత్‌ వృద్ధికి పెద్దగా సహకరించకపోవచ్చని భల్లా అభిప్రాయపడ్డారు. అందువల్ల దేశీయ డిమాండ్‌తో పాటు దేశీయ పెట్టుబడులు, ప్రైవేట్‌ క్యాపెక్స్‌ వృద్ధికి ప్రధాన చోదక శక్తులుగా మారాల్సి ఉంటుందని చెప్పారు.
విదేశీ ప్రత్యక్ష పెట్టుబడులను ఆకర్షించేందుకు ప్రస్తుత పెట్టుబడి విధానాల్లో సంస్కరణలు అవసరమని సూచించారు. 2015 ద్వైపాక్షిక పెట్టుబడి ఒప్పందం (BIT) పెట్టుబడులకు అనుకూలంగా లేదని విమర్శించారు.
ప్రభుత్వ విధానాలే కీలకం
పెట్టుబడులను పునరుద్ధరించేందుకు నియంత్రణ సంస్కరణలు, వ్యాపారం నిర్వహణలో సౌలభ్యం పెంపు అవసరమని భల్లా అన్నారు. పెట్టుబడుల నిర్ణయాలను ప్రభావితం చేసే విషయంలో ప్రభుత్వ విధానాలదే కీలక పాత్ర అని పేర్కొన్నారు. 8 శాతం వృద్ధి లక్ష్యాన్ని చేరుకోవాలంటే పెట్టుబడుల రేటు పెంపుతో పాటు ప్రైవేట్‌ క్యాపెక్స్‌కు ప్రోత్సాహం, FDI సంస్కరణలు, మెరుగైన వ్యాపార వాతావరణం అవసరమని భల్లా స్పష్టం చేశారు.