తెలంగాణలోని సర్కార్ దవాఖానాల్లో MRI సేవలను నిరంతరాయంగా అందించేందుకు రాష్ట్ర ప్రభుత్వం పీపీపీ విధానాన్ని పరిశీలిస్తోంది. తొలిదశలో నిజామాబాద్‌, ఖమ్మం, మహబూబ్‌నగర్‌ జీజీహెచ్‌లలో పైలట్‌ ప్రాజెక్టు చేపట్టే అవకాశం ఉంది. MRI యంత్రాల కొనుగోలు, నిర్వహణ, సిబ్బంది నియామకం ప్రైవేటు సంస్థలు చేపట్టనున్నాయి. వైద్యులు సూచించిన స్కాన్లను పేదలకు ఉచితంగా అందించి, సీజీహెచ్ఎస్, ఆరోగ్యశ్రీ రేట్ల ప్రకారం సంస్థలకు రీయింబర్స్‌ చేయనున్నారు. డిజిటల్‌ పీఏసీఎస్ ద్వారా రిపోర్టులు, బిల్లింగ్‌ను పర్యవేక్షించనున్నారు
ప్రభుత్వ ఆసుపత్రుల్లో MRI సేవలను నిరంతరాయంగా అందుబాటులోకి తీసుకురావడంపై రాష్ట్ర ప్రభుత్వం దృష్టి సారించింది. ప్రభుత్వ జనరల్‌ హాస్పిటల్స్‌లో పబ్లిక్‌–ప్రైవేట్ పార్ట్‌నర్‌షిప్‌ (PPP) విధానంలో MRI మిషన్లను ఏర్పాటు చేయాలని వైద్య ఆరోగ్య శాఖ యోచిస్తోంది. ప్రస్తుతం గాంధీ, ఉస్మానియా వంటి ప్రధాన ఆసుపత్రుల్లో MRI సేవలు అందుబాటులో ఉన్నప్పటికీ, యంత్రాల నిర్వహణలో లోపాలతో తరచూ సేవలు నిలిచిపోతున్నాయి. దీంతో పేద రోగులు ప్రైవేట్ డయాగ్నస్టిక్‌ కేంద్రాలను ఆశ్రయించాల్సి వస్తోంది. ఈ సమస్యకు పరిష్కారంగా తొలిదశలో నిజామాబాద్‌, ఖమ్మం, మహబూబ్‌నగర్‌ జీజీహెచ్‌లలో పీపీపీ-MRI సేవలను పైలట్‌ ప్రాజెక్టుగా ప్రారంభించాలని ప్రభుత్వం భావిస్తున్నట్లు వైద్యశాఖ వర్గాలు తెలిపాయి. ఈ ఆసుపత్రులకు చుట్టుపక్కల గ్రామీణ ప్రాంతాల నుంచి పెద్ద సంఖ్యలో రోగులు వస్తుండటంతో ఇక్కడ MRI సేవలు అందుబాటులోకి వస్తే వారికి ప్రయోజనం కలగనుంది.
గతంలో టీజీఎమ్ఎస్ఐడీసీ ద్వారా MRI యంత్రాలను కొనుగోలు చేసినప్పటికీ వారంటీ, ఉచిత నిర్వహణ గడువు ముగిసిన తర్వాత అనేక ఆసుపత్రుల్లో యంత్రాలు పనిచేయకుండా పోయాయి. కూలింగ్‌ సిస్టమ్‌, హీలియం గ్యాస్‌, సాఫ్ట్వేర్ వంటి వాటిలో సమస్యలు తలెత్తితే మరమ్మతులకు ప్రత్యేక బడ్జెట్‌ లేకపోవడం, ప్రభుత్వ అనుమతుల ప్రక్రియకు నెలల సమయం పట్టడంతో స్కానింగ్‌ సేవలు నిలిచిపోయేవి. ప్రమాద బాధితులు, మెదడు, వెన్నుపాము, నరాల సమస్యలతో వచ్చే పేద రోగులు ప్రైవేట్ కేంద్రాలకు వెళ్లాల్సి వచ్చేది. అక్కడ ఒక్కో MRI స్కాన్‌కు రూ.5 వేల నుంచి రూ.12 వేల వరకు ఖర్చవుతోంది. ఈ భారాన్ని తగ్గించేందుకు పీపీపీ విధానాన్ని అమలు చేయాలని ప్రభుత్వం భావిస్తోంది.
ప్రతిపాదిత విధానంలో ఆసుపత్రి ప్రాంగణంలో స్థలం, ప్రాథమిక మౌలిక సదుపాయాలను ప్రభుత్వం కల్పిస్తుంది. రూ.10 కోట్ల నుంచి రూ.15 కోట్ల విలువైన MRI యంత్రం కొనుగోలు, రేడియాలజిస్టులు, రేడియోగ్రాఫర్లు, టెక్నీషియన్ల నియామకం, కూలింగ్‌ వ్యవస్థ, సాఫ్ట్వేర్ అప్‌డేట్లు, రోజువారీ నిర్వహణ బాధ్యతలను ప్రైవేటు సంస్థలు చేపడతాయి. సాంకేతిక లోపం తలెత్తితే 24 గంటల్లో సేవలను పునరుద్ధరించేలా నిబంధనలు ఉండనున్నాయి. వైద్యులు సూచించిన MRI స్కాన్లను అర్హులైన పేద రోగులకు ఉచితంగా అందించి సీజీహెచ్ఎస్, ఆరోగ్యశ్రీ రేట్ల ప్రకారం సంస్థలకు ప్రభుత్వం రీయింబర్స్‌ చేయనుంది. డిజిటల్‌ పీఏసీఎస్ ద్వారా స్కాన్‌ రిపోర్టులను వైద్యులకు ఆన్‌లైన్‌లో అందుబాటులోకి తీసుకురానున్నారు