D News: Aug 8: ప్రపంచానికి భిన్నంగా భారత్లో AIతో కొత్త ఉద్యోగాల సృష్టి
భారత్, అమెరికా, బ్రిటన్, వియత్నాం, ఫిలిప్పీన్స్ వంటి దేశాల్లో ఆర్టిఫిషియల్ ఇంటెలిజెన్స్ (AI) ప్రభావం ఐటీ సేవల రంగంపై వేగంగా పడుతోంది. AI సాయంతో అనేక పనులను ఆటోమేట్ చేసే అవకాశం ఉండటంతో ఉద్యోగుల అవసరం క్రమంగా తగ్గుతుందనే ఆందోళనలు వ్యక్తమవుతున్నాయి. ఈ నేపథ్యంలో అమెరికా, బ్రిటన్ సహా పలు దేశాల్లో టెక్ కంపెనీలు ఉద్యోగుల సంఖ్యను తగ్గిస్తున్నాయి.
అయితే భారత్లో మాత్రం పరిస్థితి కొంత భిన్నంగా ఉందని నోమురా హోల్డింగ్స్ నిర్వహించిన అధ్యయనం వెల్లడించింది. AI కారణంగా ఉద్యోగాలు కోల్పోతున్న వారి కంటే, AI సంబంధిత పనుల కోసం కొత్తగా నియమించబడుతున్న ఉద్యోగుల సంఖ్య భారత్లో ఎక్కువగా ఉందని సంస్థ తన నివేదికలో పేర్కొంది. ప్రపంచంలోని ఇతర దేశాలతో పోలిస్తే భారత్లో కనిపిస్తున్న ఈ ధోరణి ప్రత్యేకంగా నిలుస్తోందని తెలిపింది.
‘రియల్-వరల్డ్ టెస్ట్ కేస్’గా భారత్
AI కారణంగా ఉద్యోగాలు భారీగా తగ్గిపోతాయనే భయాల మధ్య భారత్లో నమోదవుతున్న ఈ పరిణామం ఆసక్తికరంగా మారింది. దీంతో ప్రపంచ దేశాల దృష్టి భారత జాబ్ మార్కెట్పై పడుతోంది. AI వల్ల ఉద్యోగాలు పోవడం మాత్రమే కాకుండా, కొత్త రకాల ఉద్యోగాలను ఎలా సృష్టించవచ్చో, మారుతున్న టెక్నాలజీకి అనుగుణంగా ఉపాధి అవకాశాలను ఎలా పెంచవచ్చో అర్థం చేసుకునేందుకు భారత్ ఒక ‘రియల్-వరల్డ్ టెస్ట్ కేస్’గా మారుతోందని విశ్లేషణలు సూచిస్తున్నాయి.
ప్రపంచవ్యాప్తంగా ‘బ్యాక్ ఆఫీస్’గా పేరుగాంచిన భారత్లో అనేక రంగాలకు చెందిన ఐటీ సేవలు అందుతున్నాయి. సాఫ్ట్వేర్ డెవలప్మెంట్ నుంచి డేటా ప్రాసెసింగ్, కస్టమర్ సపోర్ట్, బిజినెస్ ప్రాసెస్ సేవల వరకు విస్తృతమైన కార్యకలాపాలు ఇక్కడ కొనసాగుతున్నాయి. ఇలాంటి భారీ ఐటీ సేవల మార్కెట్లో AI ప్రభావం ఎక్కువగా ఉండాల్సినప్పటికీ, ఉద్యోగాల కోతలతో పాటు AI ఆధారిత కొత్త అవకాశాలు కూడా పెరుగుతుండటం భారత జాబ్ మార్కెట్లో వస్తున్న మార్పులను సూచిస్తోంది.