D News: Jul 17: మెటా ఏఐ: సోషల్ మీడియా దిగ్గజం మెటా యువ వినియోగదారుల భద్రతను మరింత బలోపేతం చేసే దిశగా కీలక నిర్ణయం తీసుకుంది. ఇన్‌స్టాగ్రామ్, ఫేస్‌బుక్‌లో అందుబాటులో ఉన్న మెటా ఏఐ (Meta AI) చాట్‌బాట్‌తో టీనేజర్లు ఆత్మహత్య లేదా స్వీయ-హానికి సంబంధించిన అంశాలపై సంభాషిస్తే, ఆ విషయాన్ని వారి తల్లిదండ్రులకు నోటిఫికేషన్ ద్వారా తెలియజేసే కొత్త ఫీచర్‌ను ప్రవేశపెట్టింది. ఆర్టిఫిషియల్ ఇంటెలిజెన్స్ చాట్‌బాట్‌ల ప్రభావంపై ప్రపంచవ్యాప్తంగా వ్యక్తమవుతున్న ఆందోళనల నేపథ్యంలో ఈ పేరెంటల్ సూపర్‌విజన్ ఫీచర్‌ను తీసుకొచ్చినట్లు మెటా తెలిపింది.
ప్రస్తుతం ఈ ఫీచర్ అమెరికా, యునైటెడ్ కింగ్‌డమ్, కెనడా, ఆస్ట్రేలియాలో ఇన్‌స్టాగ్రామ్ పేరెంటల్ సూపర్‌విజన్ టూల్స్ వినియోగిస్తున్న కుటుంబాలకు అందుబాటులోకి రానుంది. ఈ ఏడాది చివరి నాటికి భారతదేశంతో పాటు ప్రపంచవ్యాప్తంగా ఉన్న వినియోగదారులందరికీ ఈ సదుపాయాన్ని విస్తరించనున్నట్లు మెటా ప్రకటించింది.
టీనేజర్లు మెటా ఏఐతో జరిపే సంభాషణల్లో ఆత్మహత్య లేదా స్వీయ-హానికి సంబంధించిన ప్రత్యక్ష, పరోక్ష సంకేతాలను గుర్తించేందుకు ప్రత్యేక ఏఐ వ్యవస్థను రూపొందించారు. పిల్లల ఉద్దేశం పూర్తిగా స్పష్టంగా లేకపోయినా అనుమానాస్పదంగా అనిపించే పరిస్థితుల్లో కూడా ఈ వ్యవస్థ తల్లిదండ్రులకు హెచ్చరిక పంపేలా రూపొందించారు.
అయితే ఈ ఫీచర్ ద్వారా తల్లిదండ్రులు పిల్లల పూర్తి చాట్ హిస్టరీని చూడలేరు. గోప్యతను పరిరక్షిస్తూ, గత వారం రోజులలో తమ పిల్లలు మెటా ఏఐతో ఏయే విస్తృత అంశాలపై చర్చించారనే సమాచారాన్ని మాత్రమే తెలుసుకునే అవకాశం ఉంటుంది. దీంతో పిల్లల వ్యక్తిగత గోప్యతకు భంగం కలగకుండా భద్రతను కూడా మెరుగుపరచాలని మెటా లక్ష్యంగా పెట్టుకుంది.
ఇప్పటికే టీనేజర్లతో లైంగిక, శృంగారభరిత లేదా మద్యం సంబంధిత సున్నితమైన అంశాలపై మెటా ఏఐ స్పందించకుండా పలు ఆంక్షలు అమల్లో ఉన్నాయి. ఇప్పుడు వాటికి తోడు మానసిక ఆరోగ్యానికి సంబంధించిన ప్రమాదకర సంకేతాలను కూడా గుర్తించే సామర్థ్యాన్ని ఈ వ్యవస్థకు జోడించారు.
అదనంగా, ఒకవేళ వినియోగదారుడు తక్షణ ఆత్మహత్య ప్రమాదంలో ఉన్నట్లు ఏఐ గుర్తిస్తే, స్థానిక అత్యవసర సేవలకు నేరుగా సమాచారం అందించే కొత్త ఫీచర్‌ను కూడా మెటా అభివృద్ధి చేస్తోంది. గతంలో ఫేస్‌బుక్, ఇన్‌స్టాగ్రామ్ పోస్టుల్లో ఆత్మహత్యకు సంబంధించిన కంటెంట్‌ను గుర్తించి చర్యలు తీసుకున్న విధానాన్ని ఇప్పుడు మెటా ఏఐ చాట్‌బాట్‌లకు కూడా విస్తరిస్తూ, యువత భద్రతకు మరింత ప్రాధాన్యత ఇస్తోంది.