D Spiritual: Jul 4: తిరుమల వేంకటేశ్వర స్వామి వారి దివ్య ప్రసాదమైన శ్రీవారి లడ్డూ విక్రయాలు ఈ ఏడాది వేసవి సీజన్లో మునుపెన్నడూ లేని స్థాయిలో కొత్త రికార్డులు నమోదు చేశాయి. తిరుమల తిరుపతి దేవస్థానం (TTD) విడుదల చేసిన తాజా గణాంకాల ప్రకారం, భక్తుల రద్దీ పెరగడంతో లడ్డూల విక్రయాలు నెల నెలా గణనీయంగా వృద్ధి చెందాయి.
ఈ ఏడాది ఏప్రిల్ నెలలో మొత్తం 1,11,96,170 లడ్డూలు విక్రయమయ్యాయి. అనంతరం మే నెలలో ఆ సంఖ్య 1,21,35,528కు పెరిగింది. ఇక జూన్ నెలలో ఏకంగా 1,26,81,805 లడ్డూలు విక్రయమై, ఇప్పటివరకు నమోదైన అత్యధిక నెలవారీ విక్రయాల రికార్డును సృష్టించాయి.
వేసవి సెలవుల నేపథ్యంలో దేశ విదేశాల నుంచి భారీ సంఖ్యలో భక్తులు తిరుమలకు తరలిరావడం ఈ పెరుగుదలకు ప్రధాన కారణంగా భావిస్తున్నారు. స్వామివారి దర్శనం అనంతరం భక్తులు శ్రీవారి లడ్డూ ప్రసాదాన్ని పెద్ద ఎత్తున కొనుగోలు చేయడంతో విక్రయాలు అనూహ్యంగా పెరిగాయి.
గత కొన్నేళ్ల జూన్ నెలల గణాంకాలను పరిశీలిస్తే శ్రీవారి లడ్డూపై భక్తుల ఆదరణ ఏటా పెరుగుతున్నట్లు స్పష్టమవుతోంది. 2024 జూన్లో 1,02,64,364 లడ్డూలు విక్రయమవగా, 2025 జూన్లో ఆ సంఖ్య 1,19,21,353కు చేరింది. ప్రస్తుతం 2026 జూన్లో అది మరింత పెరిగి 1,26,81,805కు చేరి మరో మైలురాయిని నమోదు చేసింది.
గత ఏడాది జూన్తో పోల్చితే ఈసారి అదనంగా 7,59,452 లడ్డూలు విక్రయమవడం విశేషం. భక్తుల పెరుగుతున్న డిమాండ్కు అనుగుణంగా తిరుమల పొటులో నాణ్యమైన నెయ్యి, జీడిపప్పు, ఏలకులతో లడ్డూల తయారీని నిరంతరాయంగా కొనసాగిస్తున్న TTD సిబ్బంది, భక్తులకు ఎలాంటి కొరత లేకుండా ప్రసాదాన్ని అందుబాటులో ఉంచుతున్నారు.