D Spiritual: Jan 7: విఘ్నాలు తొలగించే విఘ్నేశ్వరుడిని ప్రథమ దేవుడిగా భావిస్తారు. దేవతలందరూ కూడా విఘ్నేశ్వరుడిని పూజిస్తారంటే ఆయన మహిమ ఎంత గొప్పదో మనం అర్థం చేసుకోవచ్చు. అందువల్ల ఏ శుభకార్యం జరిగినా, పూజా కార్యక్రమాలు ప్రారంభమైనా ముందుగా వినాయకుడికి పూజ చేయడం ఆనవాయితీ. గణపతి పూజ పూర్తైన తరువాతే మిగిలిన పూజా కార్యక్రమాలు ప్రారంభిస్తారు.
ఇంతటి మహిమ గల వినాయకుడు దేశవ్యాప్తంగా అనేక ప్రాంతాలలో కొలువై ఉండి భక్తుల కోరికలను నెరవేర్చుతూ ఉంటాడు. వినాయకుడు కొలువై ఉన్న పుణ్యక్షేత్రాలలో తూర్పుగోదావరి జిల్లాలోని బిక్కవోలులో ఉన్న శ్రీ లక్ష్మీ గణపతి ఆలయం ఒక ప్రముఖ క్షేత్రంగా నిలిచింది.
క్రీస్తు శకం 840 సంవత్సరంలో చాళుక్యులచే నిర్మించబడిన ఈ ఆలయంలో కొలువై ఉన్న శ్రీ లక్ష్మీ గణపతికి విశేష ప్రాముఖ్యత ఉంది. ఎంతో ప్రసిద్ధి చెందిన ఈ ఆలయానికి సుదూర ప్రాంతాల నుంచి భక్తులు తరలివచ్చి వినాయకుడిని దర్శించుకుని తమ కోరికలు నెరవేర్చాలని ప్రార్థనలు చేస్తారు. ఈ ఆలయంలో ప్రత్యేకంగా విఘ్నేశ్వరుడి చెవిలో భక్తులు తమ కోరికలను చెప్పి వేడుకోవడం ఆనవాయితీగా ఉంది.
ఈ ఆలయంలో విఘ్నేశ్వరుడితో పాటు నందీశ్వరుడు, భూలింగేశ్వరుడు కొలువై ఉండటం మరో విశిష్టత. అంతేకాకుండా వీరభద్రుడు, సుబ్రహ్మణ్యేశ్వర స్వామి కూడా ఈ ఆలయంలో భక్తులకు దర్శనమిస్తారు.
ఈ ఆలయానికి వచ్చిన భక్తులు తమ మనసులోని కోరికలను గణపతి చెవిలో చెప్పితే అవి తప్పక నెరవేరుతాయని ప్రజల నమ్మకం. ప్రతి సంవత్సరం గణపతి నవరాత్రులు మరియు సుబ్రహ్మణ్యేశ్వర స్వామి ఉత్సవాలు ఎంతో ఘనంగా నిర్వహించబడతాయి. భక్తిశ్రద్ధలతో గణపతికి హోమం చేయించుకుంటే ఆ కుటుంబంలోని సమస్యలు తొలగిపోయి, జీవితాంతం గణపతి ఆ కుటుంబానికి అండగా ఉంటాడని పండితులు చెబుతున్నారు. అందువల్ల భక్తులు ఈ ప్రసిద్ధ ఆలయాన్ని దర్శించి తమ కోరికలు నెరవేరాలని వినాయకుడిని భక్తితో ప్రార్థించవచ్చు.