మధురలో సన్నీ లియోన్ న్యూ ఇయర్ ఈవెంట్ రద్దు: ధార్మిక సంఘాల ఆగ్రహం!

DET:DEC 31:
మధురలో సన్నీ లియోన్ ఈవెంట్ రద్దు:
నూతన సంవత్సర 2026 వేడుకల సందర్భంగా మధురలోని ఒక ప్రముఖ హోటల్‌లో బాలీవుడ్ నటి సన్నీ లియోన్‌తో ఒక భారీ డీజే నైట్ నిర్వహించేందుకు నిర్వాహకులు సిద్ధమయ్యారు.జనవరి 1వ తేదీ రాత్రి జరగాల్సిన ఈ కార్యక్రమం కోసం అన్ని ఏర్పాట్లు పూర్తి కావడమే కాకుండా టికెట్ల అమ్మకాలు కూడా జరిగాయి.అయితే ఈ ప్రోగ్రామ్ గురించి తెలియగానే స్థానిక ఆధ్యాత్మిక వేత్తలు,సాధువులు తీవ్రంగా స్పందించారు.

మండిపడ్డ సాధువులు మరియు ధార్మిక సంస్థలు:
మధుర వంటి పవిత్ర పుణ్యక్షేత్రంలో సన్నీ లియోన్ వంటి నటితో వినోద కార్యక్రమాలు నిర్వహించడం ఏంటని స్థానిక సాధువులు,హిందూ సంఘాలు తీవ్ర అభ్యంతరం వ్యక్తం చేశాయి.శ్రీకృష్ణుడు పుట్టిన గడ్డపై అశ్లీలతకు తావు ఉండకూడదని ఇలాంటి పాశ్చాత్య సంస్కృతి కలిగిన ఈవెంట్లు నగర పవిత్రతను దెబ్బతీస్తాయని వారు మండిపడ్డారు.ఈ మేరకు వారు జిల్లా మెజిస్ట్రేట్‌కు ఫిర్యాదు చేయడమే కాకుండా కార్యక్రమాన్ని నిలిపివేయాలని డిమాండ్ చేస్తూ నిరసనలకు దిగారు.

వెనక్కి తగ్గిన నిర్వాహకులు:
నిరసనలు ఉధృతం కావడంతో హోటల్ యాజమాన్యం మరియు ఈవెంట్ నిర్వాహకులు పునరాలోచనలో పడ్డారు.ప్రజల మనోభావాలను,సాధువుల అభ్యంతరాలను గౌరవిస్తూ సన్నీ లియోన్ ప్రోగ్రామ్‌ను రద్దు చేస్తున్నట్లు అధికారికంగా ప్రకటించారు. కేవలం ఒక కళాకారిణిగానే ఆమెను ఆహ్వానించామని,అయితే స్థానిక సంప్రదాయాలు మరియు ఆధ్యాత్మిక విలువలకు భంగం కలగకూడదనే ఉద్దేశంతో ఈ నిర్ణయం తీసుకున్నట్లు హోటల్ యజమాని స్పష్టం చేశారు.

ఆధ్యాత్మిక నగర పవిత్రతే ముఖ్యం:
ఈ నిర్ణయం పట్ల స్థానిక భక్తులు మరియు ధార్మిక సంస్థలు హర్షం వ్యక్తం చేస్తున్నాయి.బ్రజ్ భూమి అనేది తపస్సుకు,భక్తికి నెలవని,ఇక్కడ కేవలం భజనలు,కీర్తనలు మాత్రమే వినిపించాలని వారు పేర్కొంటున్నారు.గతంలో కూడా సన్నీ లియోన్ నటించిన ఒక మ్యూజిక్ వీడియో విషయంలో ఇలాంటి వివాదమే తలెత్తిన సంగతి తెలిసిందే.తాజా ఘటనతో ఆధ్యాత్మిక ప్రదేశాల్లో ఇలాంటి వేడుకల పట్ల ప్రజల్లో ఉన్న వ్యతిరేకత మరోసారి స్పష్టమైంది.