D Spiritual: Dec 30: అక్షితలు అంటే విరగని బియ్యం గింజలు. ఇవి సమృద్ధి, శుభత్వం, ఐశ్వర్యానికి ప్రతీకగా హిందూ సంప్రదాయంలో భావిస్తారు. అందుకే ప్రతి పూజ, వ్రతం, శుభకార్యంలో అక్షితలకు ముఖ్యమైన స్థానం ఉంటుంది. అక్షితలతో చేసే పరిహారాలు భక్తితో ఆచరిస్తే ధనలాభం, మానసిక శాంతి కలుగుతుందని పండితులు చెబుతున్నారు.
ధనవృద్ధి కోసం చేయాల్సిన పరిహారంగా 21 బియ్యం గింజలకు పసుపు రాసి, ఎర్రటి వస్త్రంలో కట్టి లక్ష్మీదేవి వద్ద పూజ చేయాలి. పూజ సమయంలో లక్ష్మీదేవిని స్మరిస్తూ సంపద, స్థిరత్వం కోరుకోవాలి. అనంతరం ఆ అక్షితల పొట్లాన్ని బీరువాలో లేదా ధనస్థానంలో ఉంచాలి. ఇలా చేయడం వల్ల ఇంట్లో ధనం నిలిచి, అనవసర ఖర్చులు తగ్గుతాయని విశ్వాసం ఉంది.
ఇంకొక ముఖ్యమైన పరిహారం సోమవారం రోజున శివారాధనతో సంబంధం కలిగి ఉంటుంది. సోమవారం శివునికి అత్యంత ప్రీతికరమైన రోజు కావడంతో, ఆ రోజున కొంత బియ్యాన్ని శివలింగం ముందు ఉంచి పూజ చేయాలి. అందులో గుప్పెడు బియ్యంతో శివుని అర్చించి, మిగిలిన బియ్యాన్ని పేదలకు లేదా అవసరమైన వారికి దానం చేయాలి. ఈ విధంగా దానం చేయడం వల్ల పుణ్యం లభించి గ్రహదోషాలు, ఆర్థిక ఇబ్బందులు తగ్గుతాయని చెబుతారు.
ఈ అక్షిత పరిహారాలను క్రమంగా, నమ్మకంతో పాటిస్తే కేవలం ధనలాభమే కాకుండా, మనసుకు ప్రశాంతత, కుటుంబంలో శుభవాతావరణం ఏర్పడుతుందని పండితుల అభిప్రాయం. భక్తి, నియమం, సాత్విక భావనతో చేసే ప్రతి ఆచారం మంచి ఫలితాలను ఇస్తుందని పెద్దలు సూచిస్తున్నారు.