D Spiritual: Dec 20: ఆంధ్రప్రదేశ్లో 2027 జూన్లో నిర్వహించనున్న గోదావరి పుష్కరాల కోసం రాష్ట్ర ప్రభుత్వం ముందుగానే సన్నాహాలు ప్రారంభిస్తోంది. ఈ మహా ఆధ్యాత్మిక కార్యక్రమాన్ని ఘనంగా నిర్వహించాలనే లక్ష్యంతో ప్రభుత్వ యంత్రాంగం కసరత్తు చేస్తోంది.
పుష్కరాల నిర్వహణ కోసం ఏలూరు, కాకినాడ, తూర్పు గోదావరి, పశ్చిమ గోదావరి, డా. బీఆర్ అంబేడ్కర్ కోనసీమ జిల్లాల్లో విస్తృత ఏర్పాట్లు చేయాలని ప్రభుత్వం భావిస్తోంది. ఆయా జిల్లాల్లో మౌలిక వసతుల అభివృద్ధిపై ప్రత్యేక దృష్టి సారించనుంది.
ఈ పుష్కరాల సందర్భంగా భక్తుల కోసం 500కు పైగా ఘాట్లను సిద్ధం చేయాలనే ప్రణాళికలు రూపొందిస్తున్నారు. భక్తులకు సౌకర్యవంతమైన ఏర్పాట్లు, భద్రతా చర్యలు, తాగునీరు, వైద్య సదుపాయాలు వంటి మౌలిక వసతుల కల్పనపై ప్రభుత్వం ప్రత్యేకంగా దృష్టి పెట్టాలని నిర్ణయించినట్లు సమాచారం.
గోదావరి పుష్కరాల నిర్వహణకు సుమారు ₹3,000 కోట్ల వరకు వ్యయం అవుతుందని అంచనా వేస్తున్నారు. ఈ మొత్తంలో ఎక్కువ భాగాన్ని కేంద్ర ప్రభుత్వ సహకారంతో సమకూర్చుకునే దిశగా రాష్ట్ర ప్రభుత్వం యోచిస్తున్నట్లు తెలుస్తోంది.
గతంలో 2015లో నిర్వహించిన గోదావరి పుష్కరాల్లో సుమారు 4.5 కోట్ల మంది భక్తులు పవిత్ర స్నానాలు ఆచరించారు. ఈసారి భక్తుల సంఖ్య గణనీయంగా పెరిగే అవకాశం ఉందని అధికారులు అంచనా వేస్తున్నారు. దాదాపు 10 కోట్ల మందికి పైగా భక్తులు హాజరవుతారని భావిస్తున్నారు.