D Spiritual: Dec9: కలియుగంలో శీఘ్ర ఫలప్రదుడు – ఆంజనేయస్వామి
కలియుగంలో వేగంగా అనుగ్రహించే దేవతామూర్తులలో ఆంజనేయస్వామి ఒకరు. ఆయన నామస్మరణ, చాలీసా పారాయణం, హనుమద్‌గింకా వంటి పూజలతో భక్తులను వెంటనే అనుగ్రహిస్తారని శాస్త్రాలు చెబుతున్నాయి. అయితే సంవత్సరంలోని కొన్ని ప్రత్యేక మాసాలు, కొన్ని నక్షత్రాలు మరియు తిథుల్లో పూజ చేస్తే మరింత ఫలప్రదంగా ఉంటుందని పండితుల అభిప్రాయం.
ఆంజనేయుని పూజకు శుభదినాలు
శాస్త్రోక్తంగా ఆంజనేయస్వామి పూజకు అనుకూలమైన మాసాలు, నక్షత్రాలు ఇవి:
- చైత్రమాసం – పుష్యమి నక్షత్రం
- వైశాఖమాసం – ఆశ్లేషా నక్షత్రం
- వైశాఖమాసం (కృష్ణపక్ష దశమీ) – హనుమజ్జయంతి
- జ్యేష్ఠమాసం – మఖా నక్షత్రం
- జ్యేష్ఠ శుద్ధ – విదియ, దశమి
- ఆషాఢమాసం – రోహిణి నక్షత్రం
- శ్రావణమాసం – పౌర్ణిమ
- భాద్రపదమాసం – అశ్విని నక్షత్రం
- ఆశ్వీయుజమాసం – మృగశీర్ష నక్షత్రం
- కార్తీకమాసం – ద్వాదశి
- మార్గశీర్షమాసం – శుద్ధ త్రయోదశి
- పుష్యమాసం – ఉత్తరా నక్షత్రం
- మాఘమాసం – ఆర్ధ్రా నక్షత్రం
- ఫాల్గుణమాసం – పునర్వసు నక్షత్రం
ఇతర శ్రేష్ఠ దినాలు:
హస్త, మృగశీర్ష నక్షత్రాలతో కూడిన ఆదివారాలు కూడా స్వామివారి పూజకు ప్రీతికరమైనవిగా పండితులు పేర్కొంటారు.
స్వామివారి జన్మ నక్షత్రం
పూర్వాభాద్ర నక్షత్రం ఆంజనేయస్వామి జన్మ నక్షత్రంగా ప్రసిద్ధి. ఈ నక్షత్రం ఏర్పడిన రోజున స్వామివారిని పూజిస్తే అపారమైన ఫలాలు లభిస్తాయని విశ్వాసం.
ప్రతి వారం పూజకు శ్రేష్ఠ దినాలు
- శనివారం – ఆంజనేయస్వామి పూజకు ప్రధాన దినం
- మంగళవారం – స్వామివారి పూజకు అత్యంత శుభదినం
- అమావాస్యతో కూడిన సోమవారం – స్వామి పూజకు ప్రీతిదినం
వైధృతి యోగంలో పూజ
విష్కంభాది 27 యోగాలలో చివరిది అయిన వైధృతి యోగం అత్యంత అపూర్వమైన గ్రహయోగం. ఈ యోగ సమయంలో ఆంజనేయునికి పూజ చేసిన వారికి విశిష్టమైన ఫలసిద్ధి కలుగుతుందని శాస్త్రోక్త నమ్మకం.
ఆంజనేయస్వామి సప్తపదనుడు – ఏకాదశ శీర్షుడు
ఆంజనేయస్వామి సప్తపదనుడు, ఏకాదశ శీర్షుడు అని శాస్త్రాల్లో చెప్పబడింది. అరటి తోటలు స్వామివారికి అత్యంత ఇష్టమైనవి. కనుక కదలీవనంలో స్వామిని పూజిస్తే శుభఫలాలు వేగంగా కలుగుతాయి.
తమలపాకులతో పూజ
మంగళకరుడైన ఆంజనేయస్వామికి తమలపాకు పూజ అత్యంత ప్రీతికరం. తమలపాకులతో పూజ చేస్తే శత్రువు నిగ్రహం, ఆరోగ్య పరిరక్షణ, ధైర్యసాహసాలు, కార్యసిద్ధి ప్రసాదమవుతాయని పురాణాలు చెబుతున్నాయి.