ఆధ్యాత్మికం: దీపం కొండెక్కిన తర్వాత వత్తులను ఏం చేయాలో తెలుసా? వత్తులు పాడేయకూడదట!

D Spiritual: Nov 13: దీపారాధన ప్రాముఖ్యత:
మనలో చాలామంది ఇంట్లో నిత్య దీపారాధన చేస్తుంటారు. కొందరు ప్రతి రోజూ దీపం వెలిగిస్తే, మరికొందరు వారంలో కొన్ని ప్రత్యేక రోజుల్లో మాత్రమే పూజ చేస్తారు. అయితే పూజ ఎప్పుడు చేసినా, కొన్నిసార్లు దీపంలోని వత్తులు పూర్తిగా కాలిపోతే, మరికొన్ని సార్లు నూనె మొత్తం అయిపోయి కేవలం వత్తులు మాత్రమే మిగిలిపోతాయి. చాలా మంది ఈ మిగిలిన వత్తులను సాధారణంగా పారేస్తారు.

వత్తులను పారేయడం ఎందుకు తప్పు:
కొంతమంది ఈ వత్తులను ఎవరు తొక్కని ప్రదేశంలో వదిలేస్తే, మరికొందరు నీటిలో వేస్తారు. కానీ ఈ రెండు విధానాలూ తప్పు అని పండితులు చెబుతున్నారు. ఎందుకంటే కాలిపోయిన వత్తులు సానుకూల శక్తిని కలిగి ఉంటాయని విశ్వాసం ఉంది. కాబట్టి వాటిని చెత్తలో లేదా నీటిలో వేయకూడదని సూచిస్తున్నారు.

సరైన విధానం:
ప్రతిరోజు దీపారాధన చేసే వారు, మిగిలిన వత్తులను సుమారు పది రోజులపాటు ఒకచోట సేకరించాలి. ఆ పది రోజుల తర్వాత, 11వ రోజు ఒక ప్రమిద తీసుకొని అందులో లవంగాలు, కర్పూరం వేసి ఆ వత్తులను కాల్చాలి.

దూపం ప్రాధాన్యత:
అలా వత్తులను కాల్చినప్పుడు ఉత్పత్తి అయ్యే దూపాన్ని ఇంటి అంతా తిప్పాలి. అది గృహంలో ఉన్న ప్రతికూల శక్తులను తొలగించి, సానుకూల శక్తిని పెంచుతుందని నమ్మకం ఉంది. ఆ దూపం పూర్తిగా కాలిపోయిన తర్వాత ఏర్పడే బూడిదను మరుసటి రోజు ఒక డబ్బాలో భద్రపరచాలి.

బూడిద వినియోగం:
ఆ బూడిదను పిల్లలకు దిష్టి తగలకుండా రక్షణగా ఉపయోగించవచ్చని చెబుతున్నారు. అలాగే, ఎవరికైనా దిష్టి తగిలితే ఆ బూడిదతో దిష్టి తీర్చవచ్చట. అంతేకాక, ఎవరైనా ముఖ్యమైన పనిమీద బయటకు వెళ్లే ముందు ఆ బూడిదను నుదిటిపై ధరించి వెళ్లితే, ఆ పని విజయవంతంగా పూర్తవుతుందని విశ్వాసం ఉంది.

మిగిలిన బూడిద వినియోగం:
ఒకవేళ ఇంకా కొంత బూడిద మిగిలితే, దానిని చెట్టు మొదట్లో వేయడం శ్రేయస్కరమని పండితులు సూచిస్తున్నారు. ఇది ప్రకృతికి పవిత్ర సమర్పణగా భావించబడుతుంది మరియు శుభఫలితాలు కలిగిస్తుందని నమ్మకం ఉంది.