తెలంగాణ ప్రభుత్వం ఆర్టీసీ, మెట్రో ప్రయాణికులకు ఊరట కలిగించే నిర్ణయం దిశగా అడుగులు వేస్తోంది. హైదరాబాద్‌లో ఆర్టీసీ బస్సులు, మెట్రో రైళ్లలో ప్రయాణించే వారికి అందుబాటులో ఉన్న కామన్ పాస్ ధరలు అధికంగా ఉన్నాయనే ఫిర్యాదుల నేపథ్యంలో ప్రభుత్వం వాటిని పునఃసమీక్షించింది. ప్రయాణికులపై ఆర్థిక భారం తగ్గించేలా కొత్త ధరల ప్రతిపాదనలను సిద్ధం చేసింది.
ప్రస్తుతం రోజువారీ ఆర్టీసీ-మెట్రో కామన్ పాస్ ధర రూ.400గా ఉంది. ఇందులో మెట్రో వాటా రూ.300 కాగా, ఆర్టీసీ వాటా రూ.100గా ఉంది. ఇక నెలవారీ కామన్ పాస్ ధర రూ.8,500గా కొనసాగుతోంది. ఇందులో మెట్రోకు రూ.7,000, ఆర్టీసీకి రూ.1,500 కేటాయిస్తున్నారు. ఈ ధరలు సామాన్యులకు భారంగా మారుతున్నాయనే అభిప్రాయాలు వ్యక్తమయ్యాయి.
ఈ నేపథ్యంలో రోజువారీ కామన్ పాస్ ధరను రూ.4,000 లేదా రూ.4,500కు తగ్గించే ప్రతిపాదనలు ప్రభుత్వం పరిశీలిస్తోంది. ధరను రూ.4,000గా నిర్ణయిస్తే ఆర్టీసీకి రూ.1,000, మెట్రోకు రూ.3,000 చెల్లించేలా ప్రణాళిక రూపొందించినట్లు సమాచారం. ఒకవేళ రూ.4,500గా నిర్ణయిస్తే మెట్రో వాటా రూ.3,500గా ఉండే అవకాశం ఉంది.
మరోవైపు ఒకే రోజులో వివిధ మార్గాల్లో ప్రయాణించే వారికి అందుబాటులో ఉండే డైలీ పాస్ ధరను కూడా తగ్గించాలని ప్రతిపాదించారు. ప్రస్తుతం రూ.400గా ఉన్న ఈ పాస్ ధరను రూ.325కు తగ్గించనున్నారు. ఇందులో ఆర్టీసీకి రూ.75, మెట్రో రైలు యాజమాన్యానికి రూ.250 చొప్పున కేటాయించేలా ప్రతిపాదనలు సిద్ధం చేసినట్లు కథనంలో పేర్కొన్నారు.
కొత్త ధరలను దీపావళి పండుగ సమయానికి అమలు చేయాలని ప్రభుత్వం భావిస్తున్నట్లు సమాచారం. అయితే ఈ ప్రతిపాదనలకు అధికారిక ఆమోదం లభించిన తర్వాతే కొత్త ధరలు అమల్లోకి రానున్నాయి. దీంతో నిత్యం బస్సులు, మెట్రోలో ప్రయాణించే ఉద్యోగులు, విద్యార్థులు, ఇతర ప్రయాణికులకు ప్రయాణ ఖర్చులు తగ్గే అవకాశం ఉంది.