DNews:06 Mar: జగిత్యాల జిల్లా బుగ్గారం మండలం చిన్నాపూర్ గ్రామంలో కాంగ్రెస్ నాయకులు దౌర్జన్యానికి పాల్పడ్డారు. దళితుడైన తిరుపతి అనే యువకుడు తన వాహనంపై వెళ్తుండగా, స్థానిక కాంగ్రెస్ సర్పంచ్ శారద భర్త గంగారాం తన కారుకు దారి ఇవ్వలేదన్న నెపంతో ఆగ్రహానికి గురయ్యారు. గంగారాంతో పాటు మరో ముగ్గురు కలిసి తిరుపతిని అడ్డుకుని, కులం పేరుతో దూషిస్తూ విచక్షణారహితంగా చితకబాదారు. బాధితుడిని రోడ్డుపై ఈడ్చిపారేస్తూ వారు చేసిన దాడి స్థానికంగా తీవ్ర కలకలం రేపింది.
ఈ దారుణానికి సంబంధించిన దృశ్యాలు సమీపంలోని సీసీటీవీ కెమెరాల్లో రికార్డయ్యాయి. ప్రస్తుతం ఈ వీడియో సోషల్ మీడియాలో వైరల్ కావడంతో అధికార పార్టీ నేతల ఆగడాలపై సర్వత్రా విమర్శలు వ్యక్తమవుతున్నాయి. బాధితుడి కుటుంబ సభ్యులు ఈ ఘటనపై పోలీసులకు ఫిర్యాదు చేయగా, నిందితులపై ఎస్సీ, ఎస్టీ అట్రాసిటీ కేసు నమోదు చేసి కఠిన చర్యలు తీసుకోవాలని దళిత సంఘాలు డిమాండ్ చేస్తున్నాయి. రాజకీయ పలుకుబడితో సామాన్యులపై, ముఖ్యంగా దళితులపై ఇటువంటి దాడులకు పాల్పడటంపై ప్రజలు మండిపడుతున్నారు.