DNews: Mar 06: కేంద్ర పర్యాటక, సాంస్కృతిక శాఖా మంత్రి గి. కిషన్ రెడ్డి తెలంగాణ ముఖ్యమంత్రి రేవంత్ రెడ్డికి లేఖ రాసి అంబర్పేట్ ఫ్లైఓవర్ కింద సర్వీస్ రోడ్ నిర్మాణంలో ఎదురవుతున్న సమస్యలను పరిష్కరించేందుకు సహకారం కోరారు. ఆయన లేఖలో పలు అంశాలను ప్రస్తావిస్తూ, ప్రధానమంత్రి నరేంద్ర మోదీ తెలంగాణలో జాతీయ రహదారుల నిర్మాణంపై ప్రత్యేక శ్రద్ధ చూపుతున్నారని తెలిపారు. రాష్ట్ర ఆర్థికాభివృద్ధికి జాతీయ రహదారులు కీలకమని, ఇప్పటివరకు రూ.1.85 లక్షల కోట్ల విలువైన ప్రాజెక్టులు నిర్మాణంలో ఉన్నాయని పేర్కొన్నారు.
2014 నుండి ఇప్పటివరకు తెలంగాణలో 2,800 కిలోమీటర్ల జాతీయ రహదారులు నిర్మించబడ్డాయని, మరో 2,500 కిలోమీటర్ల రహదారులు వివిధ దశల్లో ఉన్నాయని చెప్పారు. దీంతో రాష్ట్రంలోని 33 జిల్లాలు జాతీయ రహదారులతో అనుసంధానమయ్యాయని, ఇది గొప్ప విషయమని అన్నారు. హైదరాబాద్ నగరంలో ట్రాఫిక్ రద్దీ తగ్గించేందుకు, ప్రయాణ సమయం తగ్గించేందుకు అంబర్పేట్ క్రాస్ రోడ్ వద్ద 1.5 కి.మీ పొడవైన 4 లేన్ ఫ్లైఓవర్ను రూ.265 కోట్ల వ్యయంతో నిర్మించారని, దీనిని 2025 మే 5న కేంద్ర మంత్రి నితిన్ గడ్కరీ ప్రారంభించారని గుర్తుచేశారు.
అయితే, ఈ ఫ్లైఓవర్కు అవసరమైన భూసేకరణ పూర్తికాలేదని, ఫ్లైఓవర్ నిర్మాణం పూర్తయినా సర్వీస్ రోడ్ నిర్మాణం నిలిచిపోయిందని తెలిపారు. కొంతమంది మధ్యవర్తులు అడ్డంకులు సృష్టించడం వల్ల ఆలస్యం జరుగుతోందని, ఇప్పటికే లబ్ధిదారులకు రూ.2.54 కోట్లు పరిహారం చెల్లించినప్పటికీ సమస్య పరిష్కారం కాలేదని అన్నారు.
ఈ విషయాన్ని గత ముఖ్యమంత్రి కె. చంద్రశేఖర్ రావు, ప్రస్తుత ముఖ్యమంత్రి రేవంత్ రెడ్డి, అలాగే GHMC కమిషనర్ మరియు సంబంధిత అధికారుల దృష్టికి అనేకసార్లు తీసుకెళ్లినా పరిష్కారం రాలేదని కిషన్ రెడ్డి తెలిపారు. అందువల్ల, ముఖ్యమంత్రి రేవంత్ రెడ్డి స్వయంగా ముందడుగు వేసి GHMC, రాష్ట్ర రహదారులు మరియు భవనాల శాఖ అధికారుల ద్వారా సమస్యను పరిష్కరించి, సర్వీస్ రోడ్ నిర్మాణాన్ని పూర్తి చేయడానికి సహకరించాలని ఆయన విజ్ఞప్తి చేశారు.