DNews:06 Jan: దేశవ్యాప్తంగా సంచలనం సృష్టించిన ఫాల్కన్ ఇన్వాయిస్ డిస్కౌంటింగ్ (Falcon Invoice Discounting) స్కామ్ కేసులో నేడు (జనవరి 6, 2026) కీలక మలుపు చోటుచేసుకుంది. ఈ భారీ మోసానికి ప్రధాన సూత్రధారి, ఫాల్కన్ కంపెనీ మేనేజింగ్ డైరెక్టర్ (MD) అమర్దీప్ కుమార్ను తెలంగాణ పోలీసులు ముంబైలో అరెస్టు చేశారు.
ఫాల్కన్ స్కామ్ వెలుగులోకి వచ్చిన వెంటనే అమర్దీప్ తన భార్యతో కలిసి ప్రైవేట్ జెట్ విమానంలో దుబాయ్కు పరారయ్యారు. ఆయనపై ఇప్పటికే లుక్ అవుట్ (LOC) నోటీసులు జారీ చేసిన పోలీసులు తీవ్రంగా గాలిస్తున్నారు. ఈ క్రమంలో గల్ఫ్ దేశాల నుంచి ముంబై విమానాశ్రయానికి చేరుకున్న అమర్దీప్ను అక్కడి ఇమ్మిగ్రేషన్ అధికారులు గుర్తించి తెలంగాణ పోలీసులకు సమాచారం అందించారు. దీంతో ప్రత్యేక బృందం ముంబై వెళ్లి అతడిని అదుపులోకి తీసుకుంది. ప్రస్తుతం అతడిని ట్రాన్సిట్ రిమాండ్పై హైదరాబాద్కు తరలించే ఏర్పాట్లు చేస్తున్నారు.
హైదరాబాద్లోని హైటెక్ సిటీ కేంద్రంగా ‘క్యాపిటల్ ప్రొటెక్షన్ ఫోర్స్ ప్రైవేట్ లిమిటెడ్’ అనే సంస్థను ఏర్పాటు చేసి, ‘ఫాల్కన్’ అనే యాప్ ద్వారా ఈ మోసానికి పాల్పడ్డారు.అమెజాన్, మైక్రోసాఫ్ట్, బ్రిటానియా వంటి దిగ్గజ ఎంఎన్సీ (MNC) కంపెనీల ఇన్వాయిస్లను డిస్కౌంట్కు కొనుగోలు చేస్తామని, అందులో పెట్టుబడి పెడితే ఏడాదికి 11% నుండి 22% వరకు లాభాలు ఇస్తామని నమ్మబలికారు.ఇలా సుమారు 7,000 మంది బాధితుల నుంచి దాదాపు రూ. 850 కోట్ల మేర వసూలు చేసి బోర్డు తిప్పేశారు.
ఈ సొమ్మును క్రిప్టో కరెన్సీ, రియల్ ఎస్టేట్ మరియు విదేశీ షెల్ కంపెనీలకు మళ్లించినట్లు దర్యాప్తులో తేలింది.ఈ కేసులో ఇప్పటికే అమర్దీప్ సోదరుడు సందీప్ కుమార్, కంపెనీ సీఈఓ (CEO) యోగేంద్ర సింగ్, మరియు సీఓఓ (COO) ఆర్యన్ సింగ్లను పోలీసులు మరియు ఈడీ (ED) అధికారులు అరెస్టు చేశారు. ఎన్ఫోర్స్మెంట్ డైరెక్టరేట్ ఇప్పటికే అమర్దీప్కు చెందిన రూ. 18 కోట్ల విలువైన ఆస్తులను మరియు ఒక ప్రైవేట్ జెట్ విమానాన్ని సీజ్ చేసింది.ప్రధాన నిందితుడు అమర్దీప్ అరెస్టుతో, విదేశాలకు మళ్లించిన నగదు మరియు మరిన్ని షెల్ కంపెనీల వివరాలు బయటకు వచ్చే అవకాశం ఉందని అధికారులు భావిస్తున్నారు.