DSports:Sep18:న్యూఢిల్లీ: ఫుట్బాల్ దిగ్గజం లియోనెల్ మెస్సీ భారత ప్రధానమంత్రి నరేంద్ర మోదీకి ఓ ప్రత్యేకమైన బహుమతిని పంపాడు. సెప్టెంబర్ 17న మోదీ 75వ పుట్టినరోజు సందర్భంగా, మెస్సీ తన ఆటోగ్రాఫ్తో కూడిన 2022 ఫిఫా ప్రపంచకప్ విజేత జెర్సీని ఆయనకు బహుమతిగా పంపించాడు.
ఈ విషయాన్ని మెస్సీ భారత పర్యటనను ప్రమోట్ చేస్తున్న స్పోర్ట్స్ ఎంటర్ప్రెన్యూర్ సతద్రు దత్తా వెల్లడించారు. ఈ ఏడాది డిసెంబర్లో మెస్సీ భారత్లో పర్యటించనున్నారని, ఈ సందర్భంగా ప్రధాని మోదీని కలుసుకునే అవకాశం ఉందని తెలిపారు. మెస్సీ పర్యటనలో భాగంగా డిసెంబర్ 13న కోల్కతాలో అడుగుపెట్టి, ఆ తర్వాత ముంబై, న్యూఢిల్లీలలో పర్యటించనున్నాడు.
ప్రధాని మోదీకి తన జెర్సీని ఇవ్వాలని మెస్సీ స్వయంగా చెప్పారని సతద్రు దత్తా వివరించారు. ఈ బహుమతిని మోదీకి అందజేయడానికి ఏర్పాట్లు జరుగుతున్నాయని ఆయన పేర్కొన్నారు.
సాధారణంగా, ప్రధాని మోదీకి ప్రముఖుల నుంచి వచ్చిన బహుమతులను వేలం వేసి, వాటి ద్వారా వచ్చిన మొత్తాన్ని స్వచ్ఛంద సంస్థలకు విరాళంగా ఇస్తుంటారు. ఈ నేపథ్యంలో, మెస్సీ సంతకం చేసిన జెర్సీ వేలంలో భారీ మొత్తాన్ని పలుకుతుందని అంచనా వేస్తున్నారు. ఈ బహుమతి క్రీడా ప్రపంచంలోనే కాకుండా, రాజకీయ వర్గాల్లో కూడా చర్చనీయాంశంగా మారింది.