DNews:12 Feb: హైదరాబాద్లోని అత్యంత ఖరీదైన ప్రాంతమైన మాదాపూర్లో హైడ్రా అధికారులు ఈరోజు భారీస్థాయిలో ఆక్రమణల తొలగింపు చర్యలు చేపట్టారు. హైటెక్స్ సమీపంలోని మొండికుంట చెరువు పరిసరాల్లో ప్రభుత్వ భూమిని ఆక్రమించి నిర్మించిన సుమారు 30కి పైగా అక్రమ షెడ్లు మరియు షాపులను బుల్డోజర్లతో నేలమట్టం చేశారు. ఈ భూమి మొత్తం 11 ఎకరాల విస్తీర్ణంలో ఉండగా దీని విలువ బహిరంగ మార్కెట్లో దాదాపు రూ. 2,200 కోట్ల వరకు ఉంటుందని అధికారులు అంచనా వేస్తున్నారు. కొంతమంది వ్యక్తులు ఈ ప్రభుత్వ స్థలాన్ని కబ్జా చేసి వ్యాపార సముదాయాలు నిర్మించడమే కాకుండా వాటి ద్వారా భారీగా అద్దెలు వసూలు చేస్తున్నట్లు విచారణలో తేలింది. ఆలయాన్ని అడ్డుగా పెట్టుకుని చెరువు ఎఫ్టీఎల్ పరిధిలోని భూమిని ఆక్రమించినట్లు గుర్తించిన హైడ్రా బృందం పోలీసుల భారీ బందోబస్తు మధ్య ఈ కూల్చివేతలు పూర్తి చేసింది. స్వాధీనం చేసుకున్న స్థలం చుట్టూ వెంటనే కంచె ఏర్పాటు చేసి ప్రభుత్వ హెచ్చరిక బోర్డులను ఏర్పాటు చేశారు. ఆక్రమణలకు పాల్పడిన సూత్రధారులపై కఠినమైన క్రిమినల్ కేసులు నమోదు చేయాలని కమిషనర్ రంగనాథ్ అధికారులను ఆదేశించారు.