DNews:21 Feb: నాగర్కర్నూల్ జిల్లాలోని కుమ్మెర గ్రామంలో మల్లన్న జాతర సందర్భంగా చోటుచేసుకున్న ఘర్షణ తీవ్ర విషాదానికి దారితీసింది. దైవ దర్శనం కోసం వచ్చిన ఒక బీసీ కుటుంబాన్ని ‘తక్కువ జాతి వారు’ అంటూ ఆలయ నిర్వాహకులు లోపలికి అనుమతించకుండా అడ్డుకున్నట్లు ఆరోపణలు వస్తున్నాయి. తమను ఎందుకు అడ్డుకుంటున్నారని బాధితులు ప్రశ్నించడంతో అక్కడ ఉన్న కొందరు వ్యక్తులు ఆగ్రహంతో ఊగిపోయి చాకలి చంద్రకళ కుటుంబంపై విచక్షణారహితంగా దాడి చేశారు. ఈ అమానుషమైన తోపులాట మరియు దాడిలో ఆ కుటుంబానికి చెందిన పసిపాప తీవ్రంగా గాయపడి మృతి చెందడం స్థానికంగా పెను కలకలం సృష్టించింది.
ఈ దారుణానికి ఒడిగట్టిన వారిలో స్థానిక అధికార పార్టీ నాయకులు ఉన్నారనే వార్తలు వైరల్ కావడంతో జాతర పరిసరాల్లో తీవ్ర ఉద్రిక్తత నెలకొంది. నిందితులను కఠినంగా శిక్షించాలంటూ బాధితులు మరియు దళిత, బీసీ సంఘాలు ఆందోళనకు దిగాయి. పోలీసులు ఈ ఘటనపై కేసు నమోదు చేసి దర్యాప్తు ప్రారంభించారు. ప్రస్తుతం కుమ్మెరలో అదనపు పోలీసు బలగాలను మోహరించి పరిస్థితిని పర్యవేక్షిస్తున్నారు. కేవలం కులం ప్రాతిపదికన భక్తులపై దాడి చేయడం, ఆ క్రమంలో అభం శుభం తెలియని చిన్నారి ప్రాణం పోవడంపై రాష్ట్రవ్యాప్తంగా నిరసనలు వ్యక్తమవుతున్నాయి.