D Spiritual: Nov 28: పార్వతీ దేవి కైలాసములో శివుని రాక గురించి విని ఎంతో సంతోషించింది. భర్త కోసం అందంగా సిద్ధమవుతూ తలస్నానం చేయుటకు నలుగును పెట్టుకుంది. ఆ నలుగుతో ఒక బాలుడి రూపాన్ని తయారు చేసి, ఆ బొమ్మకు ప్రాణం పోసింది. ఆ బాలుణ్ణి ద్వారం వద్ద కాపలాగా ఉంచి, ఎవరినీ లోపలికి రానివ్వవద్దని చెప్పి స్నానానికి వెళ్లింది.
అంతలో అక్కడకు వచ్చిన పరమశివుడిని ఆ బాలుడు ఆపాడు. తల్లి ఆజ్ఞను పాటిస్తూ ఎవ్వరినీ పంపకూడదని చెప్పినందున లోనికి అనుమతించలేదు. ఆ బాలుణ్ణి పరమేశ్వరునే ఎదుర్కొన్నాడు. దీనితో కోపం వచ్చిన పరమశివుడు ఆ బాలుని శిరచ్ఛేదం చేసి లోపలికి ప్రవేశించాడు.
ఇప్పుడిక, ఒకప్పుడు గజాననుడు అనే రాక్షసుడు శివుడిని ఘోర తపస్సుతో సంతోషపరిచి, ఆయన ఎల్లప్పుడూ తన కడుపులో ఉండాలని వరం కోరుకున్నాడు. దాంతో శివుడు అతని కడుపులోనే ఉండిపోయాడు. కొన్ని రోజులకు ఈ సంగతిని తెలుసుకున్న పార్వతీ దేవి, మహావిష్ణువును ఆశ్రయించగా, ఆయన బ్రహ్మసహాయంతో నందిని తీసుకొని గంగిరెద్దును ఆడిస్తూ గజాననుడు ముందు చేరుకున్నారు. గంగిరెద్దు ఆటలో మునిగిపోయిన గజాననుడు ఏ కోరికైనా తీర్చుతానని అన్నాడు. వెంటనే విష్ణువు శివుని తిరిగి ఇవ్వమని కోరాడు.
తన వద్దకు సాక్షాత్ మహావిష్ణువే వచ్చినట్టు గ్రహించిన గజాసురుడు, నందిశ్వరుణ్ణి తన పొట్ట చీల్చమని చెప్పి శివుణ్ణి విడిపించాడు. మరణించే ముందు తన తలని లోకమంతా ఆరాధించేలా చేయమని విష్ణువును కోరాడు. ఆ తరువాత గజాసురుడు మరణించాడు.
ఇంతలో స్నానం ముగించుకుని అలంకరించుకున్న పార్వతీ దేవి శివుణ్ణి చూసి సంతోషించింది. బయట ఉన్న బాలుడు తమ బిడ్డ అని శివునికి తెలిపింది. తాను చేసిన తప్పును గ్రహించిన శివుడు గజాసురుని తలను తెప్పించి ఆ బాలుడికి అతికించి బ్రతికించాడు. గజముఖం కలిగి ఉండడం వల్ల వినాయకుడు గజాననుడు అనే పేరును పొందాడు.