D Spiritual: March 2: తిరుమల యాత్రలో తిరుమల శ్రీ వేంకటేశ్వర స్వామి దేవస్థానంలో ‘శ్రీవారి పాద తీర్థం’ స్వీకరించడం భక్తులకు అత్యంత పవిత్రమైన ఘట్టంగా భావించబడుతుంది. గంటల తరబడి వేచి స్వామివారి దివ్య మంగళ రూపాన్ని దర్శించిన అనంతరం, ఆ భక్తి తన్మయత్వంలోనే ఈ తీర్థం స్వీకరించడం ఒక ఆధ్యాత్మిక అనుభూతిగా నిలుస్తుంది. దర్శనం ముగించుకుని గర్భగుడి నుండి బయటకు రాగానే కుడివైపున విమాన ప్రదక్షిణ మార్గంలో భక్తులకు ఈ తీర్థం అందజేస్తారు. దీన్నే ‘శ్రీవారి పాద తీర్థం’గా పిలుస్తారు.
శ్రీవారి పాద తీర్థానికి ప్రత్యేకమైన విశిష్టత ఉంది. ప్రతిరోజూ స్వామివారికి జరిగే అభిషేకంలో ఉపయోగించిన పాలు, గంధం, పసుపు, కుంకుమపువ్వు, యాలకుల సుగంధం కలిసిన పవిత్ర జలమే ఈ తీర్థం. ఇందులో పచ్చకర్పూరం, తులసి దళాలు కలవడం వల్ల ఇది కేవలం ఆధ్యాత్మిక పరంగానే కాకుండా ఆరోగ్యపరంగాను విశిష్టమైనదిగా భావించబడుతుంది. “అకాల మృత్యు హరణం సర్వవ్యాధి నివారణం, సమస్త పాపక్షయకరం శ్రీవార పాదోదకం శుభం” అని భక్తులు స్మరిస్తూ ఈ తీర్థాన్ని స్వీకరిస్తారు. అకాల మృత్యువును తొలగించి, సర్వవ్యాధులను నివారించే శక్తి దీనికి ఉందని విశ్వాసం.
తీర్థం స్వీకరించే విధానానికీ ప్రత్యేక పద్ధతి ఉంది. కుడి అరచేతిని ‘గోకర్ణ ఆకృతి’లో, అంటే ఆవు చెవి ఆకారంలా మలిచి, ఎడమ చేతిని కుడి చేతి కింద ఆసరాగా ఉంచి తీర్థాన్ని తీసుకోవాలి. తాగేటప్పుడు ఎటువంటి శబ్దం చేయకుండా, నిశ్శబ్దంగా ఆచారపద్ధతిలో స్వీకరించాలి. శాస్త్రం ప్రకారం తీర్థం తీసుకున్న తర్వాత తడి చేతిని తలకు రాసుకోవద్దు. ఎందుకంటే అది భగవంతుని నిర్మాల్యంగా భావించబడుతుంది. అయితే చేతికి మిగిలిన తడిని కళ్లకు అద్దుకోవచ్చు లేదా అలాగే ఆరనివ్వడం శ్రేయస్కరం.