D Spiritual: March 2: సాధారణంగా ప్రతి ఇంట్లో పూజామందిరంలో దీపం వెలిగించిన తర్వాతే పూజా కార్యక్రమాలు ప్రారంభిస్తారు. దీపం లక్ష్మీ స్వరూపమని, దీపాన్ని వెలిగించడం ద్వారా ఇంటికి శుభాలు, ఐశ్వర్యం, శాంతి చేకూరుతాయని ఆధ్యాత్మిక గ్రంథాలు పేర్కొంటున్నాయి. అందుకే పూజలో దీపారాధనకు ప్రత్యేక స్థానం ఉంది. అయితే పూజా గదిలో ఏ విధమైన ప్రమిదలు ఉపయోగించాలి? ఎన్ని వత్తులు వేయాలి? ఏ నూనె వాడాలి? వంటి సందేహాలు చాలా మంది భక్తుల మనసులో ఉంటాయి.
దీపారాధనకు వెండి కుందులు ఉపయోగించడం శ్రేష్ఠమని పండితులు సూచిస్తున్నారు. వెండి లభించని సందర్భంలో పిత్తల లేదా మట్టి ప్రమిదలను కూడా వినియోగించవచ్చు. ఏ ప్రమిదలో దీపం వెలిగించినా, దాని కింద చిన్న పళ్లెం లేదా తట్టి ఉంచడం మంచిది. దేవుడి ముందు రెండు ప్రమిదలు ఉంచి, ఒకదానిలో ఆవు నెయ్యి, మరొకదానిలో నువ్వుల నూనె పోసి దీపారాధన చేయడం శుభప్రదమని భావిస్తారు.
ప్రమిదలో ఒక నిలువు వత్తి, ఒక అడ్డ వత్తి వేసి దీపారాధన చేయడం సంప్రదాయం. మూడు వత్తులతో దీపం వెలిగిస్తే సంతాన లాభం కలుగుతుందని, ఐదు వత్తులతో వెలిగిస్తే సంపదలు వృద్ధి చెందుతాయని, తొమ్మిది వత్తులతో దీపారాధన చేస్తే కీర్తి, ప్రతిష్టలు లభిస్తాయని ఆధ్యాత్మిక గ్రంథాలు మరియు పండితులు వివరిస్తున్నారు.
ప్రత్యేకంగా కార్తీక మాసంలో చేసే దీపారాధనకు విశేషమైన ప్రాధాన్యం ఉంది. ఈ కాలంలో దీపం వెలిగించడం, దీపదానం చేయడం ద్వారా అనేక పుణ్యఫలాలు లభిస్తాయని విశ్వాసం. కాబట్టి భక్తిశ్రద్ధలతో నియమ నిష్ఠలతో దీపారాధన చేయడం ద్వారా ఆధ్యాత్మిక శాంతి, కుటుంబ సౌఖ్యం, ఐశ్వర్యం పొందవచ్చని పెద్దలు సూచిస్తున్నారు.