D Spiritual: Nov 20: మనలో చాలామంది దేవుడిని ఎంతో విశ్వసిస్తారు. గ్రామ దేవతలను పూజించే ఆచారం ఇప్పటికీ భారతదేశంలోని చాలా గ్రామాలలో కొనసాగుతోంది. అలాగే కొన్ని ఆలయాలను దర్శించుకుంటే కోరిన ప్రతి కోరిక నెరవేరుతుందని ప్రజలు నమ్ముతారు. అలాంటి విశ్వాసం ఉన్న ఆలయాలలో అదిలాబాద్ జిల్లాలోని మహాలక్ష్మి ఆలయం ఒకటి. ఈ ఆలయాన్ని దర్శించుకుంటే కోరికలు నెరవేరుతాయని భక్తులు విశ్వసిస్తారు. ఈ ఆలయానికి వందల సంవత్సరాల చరిత్ర ఉన్నట్లు చెబుతారు.
ఈ ఆలయంలో అనేక దేవతామూర్తుల విగ్రహాలు దర్శనమిస్తాయి. జులై నెలలో భోనాలు, దసరా సందర్భంగా ప్రత్యేక వేడుకలు ఘనంగా నిర్వహిస్తారు. ఇక్కడ దుర్గామాత, సరస్వతి, మహాలక్ష్మి విగ్రహాలతో పాటు వినాయకుడు, నాగశేషుడి విగ్రహాలు కూడా ఉన్నాయి. అదిలాబాద్ శివారులో ఉండే ఈ ఆలయానికి భక్తుల రద్దీ ఎప్పుడూ ఎక్కువగానే ఉంటుంది.
ప్రస్తుతం ఆలయం చుట్టుపక్కల ప్రాంతాన్ని ‘మహాలక్ష్మివాడ’ అని పిలుస్తారు. ముఖ్యంగా శుభకార్యాలు ప్రారంభించే సమయంలో ఈ ఆలయాన్ని దర్శించుకోవడం ఆనవాయితీగా మారింది. ఈ ఆలయాన్ని సందర్శిస్తే కోరికలు నెరవేరుతాయని ప్రజలు విశ్వాసంతో ఇక్కడికి తరలి వస్తుంటారు. కొంతమంది తమ మొక్కులు నెరవేరిన తర్వాత ప్రత్యేకంగా ఆలయానికి వచ్చి తీరుస్తారు.
రాష్ట్ర ప్రభుత్వం ఈ ఆలయ అభివృద్ధిపై మరింత దృష్టి పెట్టి అవసరమైన సౌకర్యాలు కల్పిస్తే ఈ దేవాలయం ప్రముఖ ఆలయాల సరసన నిలుస్తుందని భావిస్తున్నారు. ఇప్పటికే ఈ ఆలయాన్ని దర్శించుకున్న తర్వాత తమ కోరికలు నెరవేరినట్టు అనేక మంది భక్తులు చెబుతున్నారు.