పాల సముద్ర నురుగుతో పుట్టిన వినాయకుడు– అభిషేకం లేని గణపతి- ‘శ్వేత వినాయకర్’ చరిత్ర ఇదే!

D Spiritual: Nov 12: శ్వేత వినాయకర్ ఆలయం (Swetha Vinayagar Temple)

ఏదైనా కార్యం ప్రారంభించే ముందు విఘ్నరాజైన వినాయకుడికి పూజ చేయడం అత్యవసరం. లేకపోతే ఆ కార్యం నిర్విఘ్నంగా పూర్తవదని మన పురాణాలు చెబుతాయి. గణపతి అనుగ్రహం ఉంటే అసాధ్యం అనుకున్న పనులు కూడా సాఫీగా పూర్తవుతాయి. అందుకే గణపతి ప్రథమ పూజనీయుడు అయ్యాడు. గణపతి ఆలయం లేని ఊరు ఉండదు. అయితే తమిళనాడులోని ఒక గణపతి ఆలయం ప్రపంచ ప్రసిద్ధి పొందింది — అదే శ్వేత వినాయకర్ ఆలయం.

శ్రీ నురుగు గణపతి
పాల సముద్రపు నురుగుతో తయారు చేసిన “శ్రీ నురుగు గణపతి” విగ్రహం ప్రపంచంలో ఏకైకమైనది. ఈ విగ్రహం తమిళనాడులో శ్వేత వినాయకర్ పేరుతో పూజలందుకుంటోంది. ఈ ఆలయాన్ని సంస్కృతంలో శ్వేత వినాయక దేవాలయం లేదా తమిళంలో వెల్లై వినాయక దేవాలయం అని పిలుస్తారు, అంటే “తెల్ల వినాయకుని ఆలయం”. ఇది తమిళనాడులోని కుంభకోణం బస్టాండు నుండి సుమారు 8 కిలోమీటర్ల దూరంలో ఉంది.

ఆలయ స్థల పురాణం
అమరత్వం కోసం దేవతలు, రాక్షసులు క్షీరసాగరాన్ని మథనం చేసిన సంగతి తెలిసిందే. ఆ మథనం సమయంలో అనేక అడ్డంకులు ఎదురయ్యాయి. అమృతం కన్నా ముందు హాలాహలం వచ్చి పరిస్థితి క్లిష్టమైంది. ఈ ఆటంకాల కారణం ఏమిటని ఆలోచిస్తున్న దేవతలకు నారద మహర్షి, గణేశుడిని ముందుగా పూజించకపోవడం వల్లే ఈ విఘ్నాలు వచ్చాయని చెప్పాడు.

పాల సముద్రపు నురుగుతో గణపతి
నారదుడి మాటలతో దేవతలు మరియు అసురులు తమ తప్పును గుర్తించి, పరమశివుడి సూచన మేరకు పాల సముద్రం నుంచి నురుగును తీసి దానితో గణేశుడి విగ్రహాన్ని తయారు చేసి పూజించారు.

ఉద్భవించిన అమృతం
వినాయకుని పూజ అనంతరం క్షీరసాగర మథనం నిర్విఘ్నంగా కొనసాగి చివరికి దేవదానవులు అమృతాన్ని పొందారు. ఆ తరువాత ఇంద్రుడు ఆ నురుగుతో చేసిన గణేశుడి విగ్రహాన్ని స్వర్గానికి తీసుకెళ్లి పూజించేవాడు. కానీ అహల్య శాప నివృత్తికోసం తరువాత ఆ విగ్రహాన్ని భూమికి తీసుకువచ్చి పవిత్ర ప్రదేశాల్లో ఉంచి పూజలు చేశాడు.

గణపతి మెచ్చిన కుంభకోణం
ఒకసారి ఇంద్రుడు ఆ నురుగుతో చేసిన శ్వేత వినాయక విగ్రహాన్ని కుంభకోణ ప్రాంతానికి తీసుకువచ్చాడు. వినాయకుడు ఆ ప్రాంత పవిత్రతకు ఆకర్షితుడై ఇక్కడే శాశ్వతంగా ఉండాలని కోరుకున్నాడు. అందుకోసం తన తండ్రి పరమశివుడి సహాయం కోరాడు.

గణపతి కోరిక తీర్చిన శివుడు
శివుడు ఒక చిన్నపిల్ల రూపంలో అక్కడికి వచ్చాడు. ఇంద్రుడు శివార్చనకు వెళ్ళేటప్పుడు ఆ పిల్లవాడి చేతికి వినాయక విగ్రహాన్ని ఇచ్చి, “ఇది కింద పెట్టకూడదు” అని చెప్పి వెళ్ళాడు. కానీ ఆ పిల్లవాడి రూపంలో ఉన్న శివుడు ఆ విగ్రహాన్ని బలిపీఠం కింద ఉంచి వెళ్లిపోయాడు.

ఇంద్రుని విఫలయత్నం
ఇంద్రుడు తిరిగి వచ్చి ఆ విగ్రహాన్ని ఎత్తడానికి ప్రయత్నించినా అది కదలలేదు. దేవశిల్పితో రథం నిర్మించి కూడా విగ్రహాన్ని కదిలించలేకపోయాడు.

అశరీరవాణి సందేశం
ఆ సమయంలో ఆకాశవాణి శ్వేత వినాయకుడు కుంభకోణంలోనే ఉండాలని తెలిపింది. ప్రతి వినాయక చవితికి ఇంద్రుడు స్వర్గం నుండి వచ్చి ఇక్కడ పూజించాలనే ఆదేశం ఇచ్చింది. అప్పుడు ఇంద్రుడు తన ప్రయత్నాన్ని విరమించుకున్నాడు. ఇప్పటికీ ప్రతి వినాయక చవితికి ఇంద్రుడు ఇక్కడ పూజించడానికి వస్తాడని భక్తులు నమ్ముతారు.

అభిషేకం లేని గణపతి
ఈ ఆలయంలో గణపతికి అభిషేకం చేయరు. పూలు, కుంకుమ, పసుపు లేదా వస్త్రాలు ఉపయోగించరు. సముద్ర నురుగుతో తయారవడంతో విగ్రహాన్ని తాకితే మాయమవుతుందని చెబుతారు. కాబట్టి కేవలం పచ్చ కర్పూరం పొడిని విగ్రహంపై చల్లడం ద్వారానే పూజ జరుగుతుంది.

కపర్దీశ్వరర్‌గా వెలసిన శివుడు
ఈ ఆలయంలో ప్రధాన దేవుడు శివుడు, ఆయనను కపర్దీశ్వరర్ అని పిలుస్తారు. పార్వతీదేవిని పెరియనకై దేవత అని పిలుస్తారు. ఆలయం సమీపంలో కావేరీ నది ప్రవహిస్తుంది.

ఆలయ విశేషాలు
శ్వేత వినాయకర్ ఆలయం సుమారు 7.25 ఎకరాల విస్తీర్ణంలో ఉంది. తూర్పు ముఖంగా ఐదు అంతస్తుల గోపురం, ఐదు మండపాలు ఉన్నాయి. గణేశుని ముందు 6 అడుగుల ఎత్తులో నాలుగు రాతి స్తంభాలు కనిపిస్తాయి.

అష్టభుజ మహాకాళి ఆలయం
ఈ ఆలయంలో ఎనిమిది చేతులతో ఉన్న అష్టభుజ మహాకాళి దేవి ప్రధాన ఆకర్షణ. అలాగే దుర్వాస మహర్షి నిర్వహించిన యజ్ఞంలో పాల్గొన్న ఋషులు ప్రతిష్ఠించిన అనేక శివలింగాలు కూడా ఉన్నాయి.

గాయత్రి మండపం
గర్భగుడి పక్కన ఉన్న మండపాన్ని గాయత్రి మండపం అంటారు. ఇందులో 24 స్తంభాలు ఉన్నాయి, ప్రతి స్తంభం గాయత్రీ మంత్రంలోని ఒక అక్షరాన్ని సూచిస్తుంది.

వినాయకుని వివాహం
ఇక్కడ వినాయకుడు మహావిష్ణువు కళ్ల నుండి పుట్టిన ఇంద్రదేవి కమలాంబల్‌ను, బ్రహ్మ వాక్కు నుండి పుట్టిన బుద్ధి దేవిని వివాహం చేసుకున్నారని చెబుతారు. అందువల్ల ఇక్కడ పూజిస్తే వివాహ అడ్డంకులు తొలిగిపోతాయని భక్తుల విశ్వాసం.

శ్వేత వినాయక దర్శనం
శ్వేత వినాయకుని దర్శనం సకల పాపహరణం, సర్వ శుభకరం.

ఓం శ్రీ మహాగణాధిపతయే నమః!