D Spiritual: Sept 21: హైదరాబాద్‌లో గణేష్ ఉత్సవాలు ఘనంగా జరుగుతున్న వేళ టాలీవుడ్ స్టార్ హీరో విజయ్ దేవరకొండ బాలాపూర్ గణనాథుడిని దర్శించుకున్నారు. శనివారం రాత్రి బాలాపూర్‌కు చేరుకున్న ఆయన ప్రత్యేక పూజల్లో పాల్గొని స్వామివారికి మొక్కులు చెల్లించుకున్నారు.
మాజీ మంత్రి సబితా ఇంద్రారెడ్డి తనయుడు పట్లోళ్ల కౌశిక్ రెడ్డితో కలిసి విజయ్ దేవరకొండ బాలాపూర్ గణేష్‌ను దర్శించుకున్నారు. ఈ సందర్భంగా గణపతికి ప్రత్యేక పూజలు నిర్వహించి ఆశీర్వాదాలు తీసుకున్నారు.
విజయ్‌ను సత్కరించిన ఉత్సవ సమితి
బాలాపూర్ గణేష్ ఉత్సవ సమితి అధ్యక్షుడు కళ్లెం నిరంజన్ రెడ్డి ఆధ్వర్యంలోని బృందం విజయ్ దేవరకొండను శాలువాతో ఘనంగా సత్కరించింది. అనంతరం బాలాపూర్ గణేష్ ఉత్సవాల్లో ప్రత్యేక ఆకర్షణగా నిలిచే ప్రసిద్ధ లడ్డూను ప్రసాదంగా అందజేశారు.
విజయ్ దేవరకొండ బాలాపూర్ గణనాథుడిని దర్శించుకున్న విషయం తెలియడంతో ఆయన అభిమానులు ఆనందం వ్యక్తం చేస్తున్నారు. ఉత్సవాల సందర్భంగా స్టార్ హీరో బాలాపూర్ గణేష్‌ను దర్శించుకోవడం ప్రత్యేక ఆకర్షణగా నిలిచింది.